गरोदर महिलेचा कुजलेला मृतदेह आढळून आल्याने संपूर्ण परिसरात भीती आणि खळबळजनक वातावरण
योगेश पांडे / वार्ताहर
पुणे – इंदापूर तालुक्यातील मदनवाडी गावाच्या हद्दीत पुलाखालील पाण्यात एका गरोदर महिलेचा कुजलेला मृतदेह आढळून आल्याने संपूर्ण परिसरात भीती आणि खळबळ उडाली आहे. चादरीत गुंडाळलेल्या अवस्थेत सापडलेला हा मृतदेह पाहून स्थानिक नागरिक थरारून गेले. या घटनेने दौंड–भिगवण परिसर हादरला असून, पोलिस आता या प्रकरणाचा गुन्हेगारी कोनातून तपास करत आहेत.
मिळालेल्या माहितीनुसार, मृत महिला अंदाजे २५ ते ३० वर्षांची असून, तिच्या डाव्या हातावर “रविराज” असा टॅटू आढळून आला आहे. आणखी एक धक्कादायक बाब म्हणजे, ती सहा ते सात महिन्यांची गरोदर असल्याची माहिती समोर आली आहे. हा प्रकार बारामती, भिगवण राज्य मार्गावरील मदनवाडी पुलाखाली उघडकीस आला. स्थानिकांना दुर्गंधी जाणवल्यानंतर त्यांनी पुलाखालून पाहणी केली असता चादरीत गुंडाळलेला मृतदेह दिसला. तात्काळ पोलिसांना कळविण्यात आले.
भिगवण पोलिसांनी घटनास्थळी धाव घेतली, पंचनामा करून मृतदेह ताब्यात घेतला. प्राथमिक तपासानुसार मृतदेहाला सुमारे पाच ते सहा दिवस झाले असावेत. मृतदेह पूर्णपणे कुजलेला असल्यामुळे महिलेची ओळख पटवणे पोलिसांसाठी मोठे आव्हान ठरले आहे.
पोलिसांच्या म्हणण्यानुसार, हा स्पष्ट खुनाचा प्रकार असण्याची शक्यता आहे. संशय असा की, महिलेचा निर्घृण खून करून तिचा मृतदेह पुलाखाली आणून टाकण्यात आला आहे. परिसरात या घटनेची माहिती समजताच नागरिकांची मोठी गर्दी जमली होती. सध्या भिगवण पोलिस ठाण्याचे पथक या प्रकरणाचा सखोल तपास करत असून, आसपासच्या सीसीटीव्ही फुटेज, हरवलेल्या महिलांच्या नोंदी आणि मोबाईल लोकेशन तपासले जात आहेत.
एकीकडे महिला सहा महिन्यांची गरोदर होती. तर, दुसरीकडे तिचा मृतदेह अशा अमानुष पद्धतीने फेकण्यात आला. या दुहेरी धक्क्याने संपूर्ण परिसरात संताप उसळला आहे. तपास अधिकार्‍यांचे म्हणणे आहे की, या महिलेची ओळख पटल्याशिवाय खुनामागील हेतू स्पष्ट होणार नाही. मात्र, प्रारंभिक तपासानुसार ही घटना पूर्वनियोजित हत्या असल्याचे संकेत मिळत आहेत. या खळबळजनक प्रकरणामुळे इंदापूर तालुक्यात प्रचंड भीतीचे वातावरण निर्माण झाले आहे, तर पोलिसांनी रहस्य उकलण्यासाठी तपासाचा वेग वाढवला आहे.