वृद्धाची १ कोटींची फसवणूक; सीबीआय अधिकारी असल्याचे भासवून सायबर भामट्यांकडून मोठी लूट
पोलीस महानगर नेटवर्क
मुंबई -:विलेपार्ले परिसरात सायबर फसवणुकीचा धक्कादायक प्रकार उघडकीस आला आहे. तब्बल ८२ वर्षीय निवृत्त वृद्धाला केंद्रीय अन्वेषण विभागाचे (सीबीआय) अधिकारी असल्याचे भासवून सायबर गुन्हेगारांनी तब्बल ₹१ कोटी ८ लाख रुपयांना गंडा घातला आहे. या प्रकरणी पश्चिम प्रादेशिक सायबर पोलीस ठाण्यात अज्ञात आरोपींविरोधात फसवणुकीचा गुन्हा दाखल करण्यात आला आहे.
व्हॉट्सॲप व्हिडिओ कॉलवरून फसवणूक
३० सप्टेंबर २०२५ रोजी पीडित वृद्धाला एका अनोळखी व्यक्तीचा व्हॉट्सॲप व्हिडिओ कॉल आला. समोरच्याने स्वतःची ओळख दिल्लीतील दूरसंचार विभागातील अधिकारी पवन कुमार अशी सांगितली. त्यानंतर त्याने वृद्धांना सांगितले की, त्यांच्या आधार कार्डाचा गैरवापर करून बनावट बँक खाते उघडण्यात आले असून त्याद्वारे आंतरराष्ट्रीय स्तरावर आर्थिक व्यवहार झाल्याचे आढळले आहे.
वृद्ध घाबरले असताना त्यांना लगेचच खुशी शर्मा (दिल्ली पोलीस उपनिरीक्षक) आणि हेमराज कोहली (सीबीआय अधिकारी) अशी ओळख सांगणाऱ्या इतर व्यक्तींकडून कॉल आले. त्यांनी नवी दिल्लीतील कनॉट प्लेस पोलीस ठाण्यात त्यांच्या विरोधात गुन्हा दाखल झाल्याचे सांगून अटक वॉरंट जारी होणार असल्याची धमकी दिली.
“क्लिअरन्स सर्टिफिकेट”च्या आमिषाने लुबाडले
या भीतीचा गैरफायदा घेत, आरोपींनी वृद्धांना “निकासाचा दाखला” मिळवण्यासाठी सर्व बँक खाते तपशील मागितले. त्यानंतर सीबीआय अधिकारी असल्याचे भासवून त्यांनी वृद्धांना सांगितले की, “आपली सर्व रक्कम पडताळणीसाठी सुरक्षित सरकारी खात्यात वळवावी लागेल.”
घाबरलेल्या वृद्धाने स्वतःच्या आणि पत्नीच्या खात्यातील ₹१ कोटी ८ लाख इतकी रक्कम आरोपींनी दिलेल्या खात्यांमध्ये वर्ग केली. या दरम्यान सायबर भामट्यांनी सतत व्हॉट्सॲप व्हिडिओ कॉलवर संपर्क ठेवून ही बाब कोणालाही सांगू नका, असे बजावले. अगदी “मुलांना सांगितल्यास त्यांनाही अटक केली जाईल” अशी धमकीही दिली.
पोलिसांत तक्रार; तपास सुरू
काही दिवसांनी वृद्धांना आपली फसवणूक झाल्याचे लक्षात आल्यानंतर त्यांनी पश्चिम प्रादेशिक सायबर पोलीस ठाण्यात तक्रार दाखल केली. पोलिसांनी अज्ञात आरोपींविरोधात फसवणूक, तोतयागिरी आणि फौजदारी कट रचल्याचे गुन्हे भारतीय न्याय संहिता (बीएनएस) आणि माहिती तंत्रज्ञान कायदा यांच्या कलमांखाली दाखल केले आहेत.
सायबर पोलिसांनी आरोपींच्या मोबाइल क्रमांक, बँक खात्यांची माहिती आणि पैशांचा प्रवाह यांचा मागोवा घेण्यास सुरुवात केली आहे.
नागरिकांना पोलिसांचे आवाहन
सरकारी किंवा तपास यंत्रणेचे अधिकारी असल्याचे सांगणाऱ्या अनोळखी व्यक्तींकडून येणाऱ्या कॉलवर विश्वास ठेवू नये, तसेच कोणतीही वैयक्तिक अथवा बँकविषयक माहिती शेअर करू नये, असे आवाहन पोलिसांनी नागरिकांना केले आहे.