नाशिकातही निघाली ‘सोनम’; पतीची हत्या केल्यानंतर त्याचे तुकडे करून घराच्या शोषखड्ड्यात बॉडी पुरली
योगेश पांडे / वार्ताहर
नाशिक – इंदोरच्या राजा रघुवंशी हत्या प्रकरणाची घटना ताजी असतानाच नाशिकमध्ये एका धक्कादायक घटनेने खळबळ उडाली आहे. सुरगाणा तालुक्यातील मालगोंदा येथे एका पत्नीने आपल्या पतीची कुऱ्हाडीने वार करून हत्या केली. इतकेच नाही, तर तिने त्याचे तुकडे करून ते घरातच पुरले. ही घटना उघडकीस आल्याने परिसरात भीतीचे वातावरण पसरले आहे. यशवंत मोहन ठाकरे असे हत्या झालेल्या व्यक्तीचे नाव आहे. ते सुरगाणा तालुक्यातील मालगोंदा येथील रहिवासी होते. त्यांच्या पत्नीनेच त्यांची हत्या केली. आपला मुलगा दोन महिन्यांपासून गुजरातमध्ये मजुरीसाठी गेला. तो अजूनही परत न आल्याने यशवंतच्या आई-वडिलांनी सुनेकडे विचारणा केली. मात्र, तिने उडवाउडवीची उत्तरे दिली.
दरम्यान, सून स्वतः गुजरातच्या बिलीमोरा येथे निघून गेली. त्यामुळे घरच्यांना संशय आला. यशवंत परत न आल्याने त्यांनी अधिक चौकशी करण्याचा प्रयत्न केला. पण काहीच पत्ता लागला नाही. अखेर, यशवंतच्या भावाची पत्नी प्रभाला भेटायला आली. त्यावेळी तिला काहीतरी संशयास्पद वाटले. तिने ही गोष्ट आपल्या नवऱ्याला सांगितली. त्यानंतर हे प्रकरण उघडकीस आले. पोलिसांनी अधिक तपास केला. तेव्हा घराच्या शोषखड्ड्यात यशवंतचा मृतदेह आढळून आला. पोलिसांनी गोणीतील तुकडे असलेला मृतदेह ताब्यात घेतला. “घरातील शोषखड्यात त्याचा मृतदेह आढळून आला,” असे पोलिसांनी सांगितले. या प्रकरणी सुरगाणा पोलीस अधिक तपास करत आहेत. या घटनेमुळे परिसरात एकच खळबळ उडाली आहे. दरम्यान, सोनम रघुवंशी या महिलेने हनिमूनला गेल्यानंतर प्रियकराच्या मदतीने राजा रघुवंशी या आपल्या पतीची हत्या केल्याच्या घटनेनं देशभर खळबळ उडाली. सोनमच्या क्रूरतेची घटना ताजी असतानाच नाशिकमधून ही घटना समोर आल्याने आश्चर्य व्यक्त केले जात असून सदर महिलेने कोणत्या कारणातून आपल्या पतीची हत्या केली, याबाबत पोलीस अधिक तपास करत आहेत.