मतदानापूर्वी अंबरनाथमध्ये खळबळ : भाजप उमेदवार पवन वाळेकर यांच्या कार्यालयावर गोळीबार, सीसीटीव्हीत हल्लेखोर कैद
पोलीस महानगर नेटवर्क
अंबरनाथ – मतदानाला अवघे दोन दिवस शिल्लक असताना अंबरनाथ शहरातील भेंडी पाडा परिसरात खळबळजनक घटना घडली आहे. भाजपाचे उमेदवार पवन वाळेकर यांच्या कार्यालयावर मंगळवारी रात्री उशिरा अज्ञात व्यक्तींनी गोळीबार केला. या हल्ल्यात जवळपास चार राऊंड फायर करण्यात आल्याची माहिती आहे.
सुदैवाने या गोळीबारात कोणतीही जीवितहानी झालेली नाही. मात्र संपूर्ण गोळीबाराची घटना कार्यालय परिसरातील सीसीटीव्ही कॅमेऱ्यात कैद झाली असून, फुटेजच्या आधारे हल्लेखोरांचा शोध घेण्याचे काम पोलीस करत आहेत.
गोळीबार सुरू असतानाच वाळेकर यांचा सुरक्षारक्षक बाहेर आला आणि हल्लेखोरांचा पाठलाग करण्याचा प्रयत्न केला. मात्र अंधाराचा फायदा घेत हल्लेखोर घटनास्थळावरून फरार झाले.
या घटनेनंतर भाजपचे कार्यकर्ते मोठ्या संख्येने पोलीस ठाण्यात जमा झाले होते. आरोपींना तात्काळ अटक करण्यात यावी, अशी मागणी यावेळी करण्यात आली. निवडणुकीच्या तोंडावर झालेल्या या गोळीबारामुळे राजकीय वातावरण तापले असून, परिसरात भीतीचे वातावरण पसरले आहे.
या प्रकरणी पोलीस अधिक तपास करत असून, परिसरात बंदोबस्त वाढवण्यात आला असल्याचे पोलीस उपायुक्त सचिन गोरे यांनी सांगितले.