विक्रोळीतील कन्नमवार नगर मध्ये २५ वर्षीय तरुणीची बिल्डिंगच्या २२ व्या मजल्यावरुन उडी घेत आत्महत्या
योगेश पांडे / वार्ताहर
मुंबई – मुंबईच्या पूर्व उपनगरातील विक्रोळी येथे एक धक्कादायक घटना घडल्याची माहिती समोर आली आहे. सोमवारी रात्री विक्रोळी पूर्वेला असणाऱ्या कन्नमवार नगरमध्ये एका तरुणीने २२ मजली इमारतीच्या सर्वात वरच्या मजल्यावरुन खाली उडी टाकून आत्महत्या केली. कन्नमवार नगर येथील इमारत क्रमांक ९७ मध्ये हा प्रकार घडला. आत्महत्या करणाऱ्या तरुणीचे नाव हर्षदा तांदोलकर (२५) असे आहे. या तरुणीने आत्महत्या का केली, याचे नेमके कारण अद्याप स्पष्ट झालेले नाही. मात्र, या घटनेमुळे विक्रोळी परिसरात एकच खळबळ उडाली आहे. ही घटना अत्यंत भयंकर असल्याचे प्रत्यदर्शींकडून सांगण्यात आले. सोमवारी रात्री या तरुणीने इमारतीच्या २२ व्या मजल्यावर असलेल्या टेरेसवर जाऊन खाली उडी टाकली. इतक्या उंचावरुन खाली पडल्यामुळे या तरुणीच्या शरीराचे दोन तुकडे झाले आणि तिचा जागीच मृत्यू झाला. हे दृश्य अंगावर अक्षरश: काटा आणणारे होते. स्थानिकांनी या घटनेची माहिती पोलिसांना दिली. त्यानंतर पोलिसांनी घटनास्थळी येत पंचनामा करुन या तरुणीचा मृतदेह ताब्यात घेतला. या तरुणीने नक्की कोणत्या कारणामुळे आत्महत्या केली, हे अजून कळू शकलेले नाही. मात्र, या घटनेमुळे नव्याने विकसित होत असलेल्या आणि उंच इमारतींचा परिसर अशी नवी ओळख धारण केलेल्या कन्नमवार नगरमध्ये खळबळ उडाली आहे. पोलिसांकडून या घटनेचा पुढील तपास सुरु आहे. या तरुणीला कोणता मानसिक किंवा शारीरिक त्रास होता का, याचा शोध पोलीस घेत आहेत. या तपासातून काय निष्पन्न होणार, याकडे सर्वांच्या नजरा लागल्या आहेत.