पोलिसांनी दिले ‘गुड टच, बॅड टच’चे धडे अन् चिमुकलीनं फोडलं बापाचं बिंग
योगेश पांडे / वार्ताहर
उल्हासनगर – उल्हासनगरमध्ये पोलीस एका शाळेत विद्यार्थिनींना गुड टच, बॅड टचचे धडे द्यायला गेले होते. ते ऐकून एका चिमुकलीला आपला बाप आपल्यासोबत दुष्कर्म करत असल्याचं उमगलं आणि तिने याबाबत शिक्षिकेला सांगितले. याप्रकरणी पोलिसांनी या नराधम बापावर पोक्सो कायद्यांतर्गत गुन्हा दाखल करत त्याला बेड्या ठोकल्या आहेत. या घटनेने उल्हासनगरात एकच संतापाची लाट उसळली आहे. उल्हासनगरात आरोपी बाप हा त्याच्या दोन मुलींसह वास्तव्याला असून त्याची पत्नी त्याच्यापासून विभक्त झाली आहे. यानंतर आपल्या मोठ्या मुलीच्या बाल अज्ञानाचा गैरफायदा घेत त्याने तिला वासनेचं शिकार केलं होतं. अशातच या मुलीच्या शाळेत उल्हासनगरच्या मध्यवर्ती पोलिसांकडून गुड टच आणि बॅड टचची माहिती देण्यात आली. ते ऐकून या चिमुकलीला आपला बाप आपल्यासोबत दुष्कर्म करत असल्याचं उमगलं.
याबाबत तिने शाळेतील शिक्षिकेला माहिती दिली. हे ऐकून शिक्षिकेला धक्काच बसला. त्यानंतर शिक्षिकेनं पोलिसांच्या मदतीनं तिच्या आईला ही बाब सांगितली आणि याबाबत आईने त्वरित मध्यवर्ती पोलीस ठाण्यात दाखल होऊन तक्रार दाखल केली. त्या तक्रारीवरून या नराधम बापाविरोधात पोलिसांनी पोक्सो आणि बलात्काराचा गुन्हा दाखल केला आहे. पोलिसांनी त्याला ताब्यात घेतलं आहे. यानंतर आता मुलीचा ताबा आईकडे देण्यात आला असून बाप आणि मुलीच्या नात्याला काळिमा फासणाऱ्या या प्रकारामुळे उल्हासनगरमध्ये संतापाची लाट उसळली आहे.