मनसे अध्यक्ष राज ठाकरेंच्या बनावट पत्राप्रकरणी आग्रीपाडा पोलीस ठाण्यात गुन्हा दाखल
पोलीस महानगर नेटवर्क
मुंबई – विधानसभा सभेच्या वरळीतील तिरंगी लढतीमुळे चुरस निर्माण झाली असताना मनसे अध्यक्ष राज ठाकरे यांच्या नावाचे बनावटपत्र वायरल झाले असून त्यात राज ठाकरे यांनी वरळी मतदारसंघात धनुष्यबाणाला समर्थन दिल्याचे नमुद करण्यात आले होते. गंभीर बाब म्हणजे या पत्रावर राज ठाकरे यांची स्वाक्षरीचाही वापर करण्यात आला आहे. मनसे कार्यकर्त्यांच्या तक्रारीवरून आग्रीपाडा पोलिसांनी गुन्हा दाखल केला आहे.
वरळी विधानसभा मतदारसंघात राज ठाकरे यांच्या नावाने एक बनावट पत्र वायरल झाले. या पत्रावर राज ठाकरे यांची बनावट स्वाक्षरी असून त्यांनी वरळीत शिवसेनेचे (शिंदे) उमेदवार मिलिंद देवरा यांना पाठिंबा दिला असल्याचा दावा या पत्राद्वारे करण्यात आला होता. यावरून मनसे आणि शिवसेनेच्या (शिंदे) पदाधिकारी व कार्यकर्त्यामध्ये वादही झाला. हिंदू मतांचे विभाजन टाळण्यासाठी मी वरळीत धनुष्यबाणाला पाठींबा देऊन शिवसेनेला (शिंदे) समर्थन देणार आहे. आपल्या मताचा सन्मान करा आणि विकसीत महाराष्ट्र घडवण्यासाठी योगदान द्या, २० नोव्हेंबरला प्रत्येकाला घराबाहेर पडून मोठ्या संख्यने मतदानाचा हक्का बजावायचा आहे. आपले प्रत्येक मत अनमोल आहे, असे या पत्रात नमुद करण्यात आले आहे. पत्राच्या खाली राज ठाकरे यांच्या स्वाक्षरीचाही वापर करण्यात आला आहे.
मनसेचे उपविभाग सचिव अक्रुर पाटकर यांच्या तक्रारीवरून याप्रकरणी आग्रीपाडा पोलिसांनी भारतीय न्याय संहिता कलम ३३६(२), ३३६(४), ३५३(२) व १७१(१) अंतर्गत गुन्हा दाखल करण्यात आला आहे. याप्रकरणी राजेश कुसळे यांच्याविरोधात हा गुन्हा दाखल करण्यात आला आहे. कुसळे शिवसेना (शिंदे) माजी शाखाप्रमुख असल्याची माहिती सूत्रांनी दिली. वरळी विभागात हे पत्र वायरल झाल्यानंतर वरळीतील मनसेचे उमेदवार संदीप देशपांडे यांनी स्वतः राज ठाकरे यांच्याशी संपर्क साथला. त्यानंतर ते पत्र खोटे असल्याचे निष्पन्न झाले. त्या पत्रात राज ठाकरे यांच्या लेटरहेडचाही वापर करण्यात आला आहे. मतदानाच्या दिवशीच बुधवारी पहाटेपासून हे पत्र वरळी विधानसभा मतदारसंघा, आग्रीपाडा परिसरात वायरल झाले होते. याप्रकरणी आग्रीपाडा पोलीस अधिक तपास करीत आहेत.