लक्झरी फर्निचर आयात घोटाळा : ३० कोटींचा महसूल बुडवल्याप्रकरणी हाँगकाँगस्थित संचालक महिलेल्या अटक
पोलीस महानगर नेटवर्क
मुंबई : महसूल गुप्तचर संचालनालयाने (DRI) लक्झरी फर्निचर आयात प्रकरणात मोठी कारवाई करत हाँगकाँगस्थित पुरवठादार कंपनीच्या एका महिला संचालकाला अटक केली आहे. आयातीत चुकीची माहिती दाखल करून सीमाशुल्क विभागाची दिशाभूल करत तब्बल ३० कोटी रुपयांचा सरकारी महसूल बुडवल्याचे या तपासातून पुढे आले आहे. या प्रकरणातील ही तिसरी अटक ठरली आहे.
यापूर्वी मे महिन्यात याच प्रकरणात रिझवान इक्बाल चुनावाला आणि साजिद हनीफ जादा यांना DRI ने ताब्यात घेतले होते. दरम्यान, तपासाचा वेग वाढवत विविध ठिकाणी छापे घालून कागदपत्रे जप्त करण्यात आली. प्राथमिक चौकशीत आयातीत फर्निचरची किंमत कमी दाखवणे, कागदपत्रांत फेरफार करणे आणि त्याद्वारे कस्टम ड्युटी, IGST व सामाजिक कल्याण अधिभार चुकवण्यात आल्याचे उघड झाले.
या प्रकरणात आणखी आरोपी आणि आर्थिक व्यवहारांचा मागोवा घेण्याचे काम सुरू असून, घोटाळ्याचे जाळे किती मोठे आहे याची चौकशी सुरू असल्याची माहिती DRI कडून देण्यात आली आहे.