धक्कादायक! सीबीडी बेलापूरमधील ‘टेल्स ऑफ टॅव्हर्न’ क्लबमध्ये अल्पवयीनांना हुक्का-दारूची पार्टी; विके ग्रुपचा मालक असल्याची माहिती!
नवी मुंबई : नवी मुंबईतील सीबीडी बेलापूर परिसरातील ‘टेल्स ऑफ टॅव्हर्न’ या बार अँड रेस्टॉरंटमध्ये अल्पवयीन मुले-मुलींना हुक्का आणि मद्य उपलब्ध करून दिले जात असल्याचा गंभीर आरोप स्थानिक रहिवाशांकडून करण्यात आला आहे. मयुरेश स्क्वेअर, सेक्टर १५ येथील शॉप क्रमांक २ व ३ मध्ये असलेल्या या आस्थापनेबाबत नागरिकांनी संताप व्यक्त केला असून तातडीने कारवाईची मागणी होत आहे.
स्थानिकांच्या म्हणण्यानुसार, बेलापूर पोलीस ठाण्याच्या नाक्याजवळ असलेल्या या क्लबमध्ये रात्री उशिरापर्यंत अल्पवयीनांची मोठ्या प्रमाणावर गर्दी होत असते. हुक्का व मद्याची कथित अवैध विक्री करून नाबालिगांना व्यसनाधीनतेकडे ढकलले जात असल्याचा आरोप करण्यात येत आहे. महाराष्ट्रात हुक्का बारवर बंदी असतानाही अशा प्रकारे नियमांचे उल्लंघन होत असल्याने पोलीस व संबंधित यंत्रणांच्या कार्यपद्धतीवर प्रश्न उपस्थित केले जात आहेत.
या आस्थापनेमुळे परिसरातील शांतता भंग होत असून रात्रीच्या गोंगाटामुळे अपघात, गुन्हेगारी तसेच आरोग्यविषयक समस्यांचा धोका वाढल्याची भीती नागरिकांनी व्यक्त केली आहे. अल्पवयीनांना मद्य किंवा हुक्का देणे हा कायद्याचा गंभीर भंग असल्याचे सांगत पालक व सामाजिक संघटना आक्रमक झाल्या आहेत.
सूत्रांकडून मिळालेल्या माहितीनुसार, संबंधित क्लबचा मालक विके ग्रुप असल्याचे सांगितले जात असून, या पार्श्वभूमीवर क्लबवर छापा टाकून परवाना रद्द करावा, दोषींविरुद्ध कठोर गुन्हे दाखल करावेत, अशी मागणी करण्यात येत आहे. या प्रकरणामुळे नवी मुंबईच्या प्रतिमेला धक्का बसत असल्याची भावना व्यक्त होत असून, पोलीस आयुक्तांनी याची दखल घेऊन तातडीने चौकशीचे आदेश द्यावेत, अन्यथा आंदोलन छेडले जाईल, असा इशाराही देण्यात आला आहे.