मुंबईच्या राम मंदिर स्थानकावर धावत्या लोकलमध्ये जन्म घेतलेल्या बाळाची प्रकृती चिंताजनक
योगेश पांडे / वार्ताहर
मुंबई – मुंबई शहरातील राम मंदिर स्थानकावर धावत्या लोकलमध्ये एका महिलेने बाळाला जन्म दिला होता. हे बाळ सध्या कूपर रुग्णालयात उपचार घेत असून बाळाच्या हृदयात छिद्र असल्याने त्याची प्रकृती चिंताजनक असल्याचे समजते. आईची प्रकृती सुधारत असली तरी बाळावर अतिदक्षता विभागात उपचार सुरू आहेत. बाळाच्या चेहऱ्यावरही काही व्यंग असून डॉक्टरांच्या देखरेखेखाली बाळावर उपचार सुरू आहेत.
याबाबत मिळालेल्या माहितीनुसार धावत्या मुंबई लोकलमध्ये मध्यरात्री १ वाजण्याच्या सुमारास गरोदर महिलेला प्रसूती वेदना सुरू झाल्यामुळे सदर महिलेला पश्चिम रेल्वेच्या राम मंदिर स्थानकावर उतरवून एका सहप्रवाशी अभियंत्या तरुणाने महिला डॉक्टरशी व्हिडिओ कॉलद्वारे संवाद साधत तिची प्रसूती केली. राम मंदिर रेल्वे स्थानकावर जन्मलेल्या या बाळाची प्रकृती आता नाजूक असून, या बाळाच्या हृदयामध्ये छिद्र असल्यामुळे ते आता जगण्यासाठी संघर्ष करत आहे. कूपर रुग्णालयात आई व बाळाला वैद्यकीय उपचारांसाठी दाखल करण्यात आलं आहे.
राम मंदिर रेल्वे स्थानकात प्रसूती झालेल्या महिलेला आणि तिच्या बाळाला तातडीने कूपर रुग्णालयामध्ये उपचारासाठी नेण्यात आले होते. रुग्णालयात उपचारानंतर आईची प्रकृती सुधारत आहे, परंतु बाळाची प्रकृती अजूनही नाजूक आहे. बाळावर नवजात शिशु अतिदक्षता विभागामध्ये उपचार करण्यात येत आहेत. बाळाच्या हृदयात छिद्र असून त्याच्या चेहऱ्यामध्ये काही व्यंग आहे. त्यामुळे बाळाला कृत्रिम श्वसनयंत्रणेची मदत देण्यात आलेली नसल्याची माहिती शिशु अतिदक्षता विभागामध्ये उपचार करणाऱ्या डॉक्टरांनी दिली. बाळावर शस्त्रक्रिया करण्याचाही निर्णय घेण्यात येणार आहे.
विरारमध्ये राहणाऱ्या २४ वर्षीय अंबिका झा नायर रुग्णालयात जात असताना बुधवारी मध्यरात्रीनंतर प्रवासादरम्यान त्यांना प्रसववेदना सुरू झाल्या होत्या. लोकलने गोरेगाव स्थानक सोडताच त्यांच्या वेदना अधिक तीव्र झाल्या आणि यामुळे लोकलमध्ये असणाऱ्या सहप्रवाशांनी आपत्कालीन साखळी ओढली आणि लोकल राम मंदिर स्थानकात थांबवली. याच लोकलमधून प्रवास करत असलेला तरुण विकास बेद्रे याने नंतर आपल्या डॉक्टर मैत्रिणीशी व्हिडिओ कॉलद्वारे संवाद साधत महिलेची प्रसूती केली होती.