पुणे आणि नांदेडमध्ये दीड कोटींहून अधिक रुपयांची सायबर फसवणूक
शेअर बाजारात गुंतवणुकीचे आमिष आणि केंद्रीय यंत्रणांची भीती दाखवून नागरिकांना जाळ्यात ओढले
पोलीस महानगर नेटवर्क
पुणे : शेअर बाजारात गुंतवणुकीचे आमिष तसेच कारवाईची भीती दाखवून सायबर चोरट्यांनी पुणे आणि नांदेड परिसरातील नागरिकांची तब्बल दीड कोटींहून अधिक रुपयांची फसवणूक केल्याचे समोर आले आहे. याप्रकरणी शिवाजीनगर सायबर पोलीस ठाणे आणि नांदेड सिटी पोलीस ठाण्यात वेगवेगळे गुन्हे दाखल करण्यात आले असून तपास सुरू आहे.
कर्वेनगर परिसरातील एका व्यावसायिकाची १ कोटी ३८ लाख रुपयांची सायबर फसवणूक झाली आहे. पोलिसांच्या माहितीनुसार, चोरट्यांनी तक्रारदाराच्या सोशल मीडिया खात्यावर शेअर बाजारातील गुंतवणुकीसंदर्भातील लिंक पाठवली. सुरुवातीला कमी रक्कम गुंतवल्यानंतर परतावा मिळाल्याने व्यावसायिकाचा विश्वास बसला. त्यानंतर वेळोवेळी मोठी रक्कम गुंतवण्यास सांगण्यात आली आणि अखेरीस एकूण १ कोटी ३८ लाख रुपये जमा करून घेतले. मात्र, त्यानंतर परतावा न मिळाल्याने व्यावसायिकाने पोलिसांकडे धाव घेतली. या प्रकरणाचा तपास वरिष्ठ पोलीस निरीक्षक स्वप्नाली शिंदे करत आहेत.
अशाच प्रकारे धायरी येथील एका व्यक्तीची १९ लाख रुपयांची फसवणूक झाल्याचा प्रकार समोर आला आहे. या प्रकरणी नांदेड सिटी पोलीस ठाण्यात गुन्हा दाखल करण्यात आला असून, वरिष्ठ पोलीस निरीक्षक अतुल भोस तपास करत आहेत.
दरम्यान, सहकारनगर भागातील ७८ वर्षीय ज्येष्ठ नागरिकाची २३ लाख रुपयांची फसवणूक झाल्याचा आणखी एक प्रकार उघड झाला आहे. चोरट्यांनी स्वतःला दिल्लीतील ‘टेलिकॉम डिपार्टमेंट ऑफ इंडिया’चे अधिकारी असल्याचे सांगून, त्यांच्या मोबाइल क्रमांकाचा वापर काळ्या पैशांच्या व्यवहारात झाल्याचे भासवले. अटक टाळण्यासाठी पैसे जमा करण्याचे सांगत त्यांनी वृद्धाकडून टप्प्याटप्प्याने २३ लाख रुपये उकळले. या प्रकरणाचा तपास गुन्हे शाखेच्या पोलीस निरीक्षक अनिता हिवरकर करत आहेत.
गेल्या काही महिन्यांपासून शेअर बाजारातील गुंतवणुकीचे आमिष आणि केंद्रीय तपास यंत्रणांच्या नावाने कारवाईची भीती दाखवून फसवणूक करण्याचे प्रकार वाढीस लागले आहेत. पोलिसांनी नागरिकांना कोणत्याही अज्ञात लिंकवर क्लिक न करण्याचे आणि संशयास्पद फोन कॉल्सना प्रतिसाद न देण्याचे आवाहन केले आहे.