वरिष्ठ पोलीस निरीक्षकाकडे तब्बल ३.४८ कोटींची बेहिशोबी संपत्ती; भ्रष्टाचार कायद्यांतर्गत गुन्हा दाखल
योगेश पांडे / वार्ताहर
नवी मुंबई– नवी मुंबई उलवे पोलिसांनी एका वरिष्ठ पोलीस निरीक्षकाविरुद्ध तब्बल ३.४८ कोटींच्या बेहिशोबी संपत्तीप्रकरणी भ्रष्टाचार प्रतिबंधक कायद्यांतर्गत गुन्हा दाखल केला आहे. संबंधित पोलीस अधिकारी सतीश एस. कदम यांच्याविरोधात ही कारवाई करण्यात आली असून, ते पूर्वी एनआरआय सागरी पोलीस ठाण्याचे वरिष्ठ पोलीस निरीक्षक होते आणि सध्या उलवे परिसरात वास्तव्यास आहेत. या प्रकरणात राज्याच्या लाचलुचपत प्रतिबंधक विभागाकडून सखोल चौकशी केल्यानंतर पोलिस ठाण्यात तक्रार दाखल करण्यात आली. उलवे पोलिस ठाण्यातील एका अधिकाऱ्याने माहिती दिली की, “दिनांक ९ जून रोजी सतीश एस. कदम यांच्याविरोधात भ्रष्टाचार प्रतिबंधक कायद्यांतर्गत गुन्हा नोंदवण्यात आला. ही तक्रार लाचलुचपत प्रतिबंधक विभागाच्या निरीक्षकाने सादर केली होती, ज्यात संबंधित अधिकाऱ्याच्या आर्थिक व्यवहारांची कसून चौकशी करण्यात आली होती.”
लाचलुचपत प्रतिबंधक विभागाच्या तपासानुसार, डिसेंबर २०१३ ते ऑक्टोबर २०२४ या काळात कदम यांनी त्यांच्या अधिकृत उत्पन्नाच्या तुलनेत २९७% अधिक संपत्ती जमा केली आहे. “या काळात त्यांनी सुमारे ३, ४८,४०,२७९ किमतीची बेहिशोबी मालमत्ता जमा केल्याचे निष्पन्न झाले आहे,” असे उलवे पोलिस अधिकाऱ्याने सांगितले. सध्या या प्रकरणात कदम यांना अटक करण्यात आलेली नाही. उलवे पोलिसांनी स्पष्ट केले की, “गुन्हा आमच्या पोलिस ठाण्यात नोंदवण्यात आला असला तरी याची सखोल चौकशी लाचलुचपत प्रतिबंधक विभागाकडे सोपवण्यात आली आहे. त्यांच्याकडून पुढील तपास सुरु आहे.” एफआयआर मध्ये संबंधित अधिकाऱ्याच्या वर्तमान पदाचा उल्लेख करण्यात आलेला नसला तरी, प्राथमिक चौकशीत भ्रष्टाचार प्रतिबंधक कायद्यान्वये गुन्हा घडल्याचे स्पष्ट झाले आहे, आणि त्यानुसार ही कायदेशीर कारवाई केली गेली आहे. पोलीस दलात उच्च पदावर कार्यरत असलेल्या अधिकाऱ्याच्या नावावर भ्रष्टाचाराच्या आरोपांची नोंद होणे ही गंभीर बाब असून, या प्रकरणामुळे पोलीस खात्याच्या विश्वासार्हतेवरही प्रश्नचिन्ह निर्माण झाले आहे. भ्रष्टाचारविरोधात कार्यरत असलेल्या यंत्रणांनी उचललेल्या पावलामुळे मोठ्या गुन्ह्यांची उकल होण्याची शक्यता व्यक्त करण्यात येत आहे. उलवे पोलिस ठाण्याच्या अधिकाऱ्यांनी या प्रकरणावर अधिक भाष्य करण्यास टाळाटाळ केली असली, तरी लाचलुचपत प्रतिबंधक विभाग लवकरच तपासाच्या पुढील टप्प्यांबाबत माहिती देण्याची शक्यता आहे.