माजी सरपंच लाचलुचपतच्या जाळ्यात, ७५ हजार लाच प्रकरणी गुन्हा दाखल
पोलीस महानगर नेटवर्क
नाशिक – राज्यात लाच घेण्याच्या प्रकरणात प्रचंड वाढ होत आहे. अशीच एक घटना घडली आहे. हॉटेल सुरू करण्यासाठी ग्रामपंचायतीचा ना हरकत दाखल देण्यासाठी ७५ हजार रुपयांची लाच मागितल्या प्रकरणी माजी सरपंचाविरुद्ध गुन्हा दाखल करण्यात आला आहे. अनिल दौलत तांबे, (वय-३६) असे लाच मागणाऱ्या माजी सरपंचाचे नाव आहे. मिळालेल्या माहितीनुसार, तक्रारदार यांनी गोंदे ता. सिन्नर जिल्हा नाशिक येथे हॉटेल परमिट रूम व बियरबार व्यवसाय सुरु करावयाचा होता त्यासाठी गोंदे ग्रामपंचायतीचे ना-हरकत प्रमाणपत्र आवश्यक असल्याने तक्रारदार यांनी गोंदे चे ग्रामपंचायत कार्यालय येथे ना-हरकत प्रमाणपत्र मिळणे बाबत अर्ज केला होता.
सदर ना-हरकत प्रमाणपत्र देण्यासाठी गोंदे चे तत्कालीन सरपंच अनिल दौलत तांबे यांनी स्वतःसाठी व ग्रामसेवक भणगीर यांचे नवाने ७५ हजार रूपये लाचेची मागणी करून भ्रष्ट व बेकायदेशीर मार्गाने स्वतःसाठी पैशांच्या स्वरूपात लाभ मिळविण्यासाठी व्यवस्था करून लाचेची मागणी केली म्हणून अनिल दौलत तांबे, माजी सरपंच, गोंदे ता. सिन्नर यांचे विरुद्ध सिन्नर पोलीस ठाण्यात भ्र.प्र.अधिनियम १९८८ चे कलम ७ व ७ (अ) प्रमाणे गुन्हा दाखल करण्यात आला आहे. सदर कारवाई पोलीस अधीक्षक शर्मिष्ठा वालावलकर, अपर अधीक्षक माधव रेड्डी यांच्या मार्गदर्शनाखाली पोलीस निरीक्षक नितीन पाटील, पोलीस नाईक चौधरी, पोलीस शिपाई अनिल गांगोडे, पो.हवा. सुनील पवार यांनी केली.