खेवलकर यांच्या अडचणींत वाढ; महिलेचे लपून अश्लील व्हिडिओ शूट केल्याप्रकरणी पुणे सायबर पोलिसांनी केला गुन्हा दाखल
योगेश पांडे / वार्ताहर
पुणे – ज्येष्ठ नेते एकनाथ खडसे यांचे जावई प्रांजल खेवलकर यांना पुणे पोलिसांनी रेव्ह पार्टी प्रकरणात अटक केल्यानंतर आता आणखी एक गंभीर प्रकरण समोर आलं आहे. महिलेचे लपून अश्लील व्हिडिओ शूट केल्याप्रकरणी प्रांजल खेवलकर यांच्यावर पुणे सायबर पोलिसांनी गुन्हा दाखल केला आहे. एका महिलेच्या तक्रारीनंतर हा गुन्हा दाखल करण्यात आला आहे. त्यामुळे खेवलकर यांच्या अडचणींत वाढ झाली आहे. मिळालेल्या माहितीनुसार, सहमती नसताना फोटो आणि व्हिडिओ काढल्याचा आरोप करत एका महिलेने प्रांजल खेवलकर यांच्याविरोधात पोलिसांत धाव घेतली. त्यानंतर पुणे सायबर पोलिसांकडून आयटी एक्ट ६६ ई आणि भारतीय न्याय संहिता ७७ अन्वये गुन्हा दाखल करण्यात आला. त्यामुळे आधीच रेव्ह पार्टी प्रकरणात अटकेत असलेल्या खेवलकर यांचा पाय आणखी खोलात गेला आहे.
महाराष्ट्र राज्य महिला आयोगाच्या अध्यक्षा रुपाली चाकणकर यांनी राज्यात मोठ्या प्रमाणात मानवी तस्करी होत असल्याचा दावा केला आहे. याविरोधात राज्य महिला आयोग काम करत आहे. त्यामुळे नागरिकांनी अशा घटनांविषयी पोलिसांना माहिती द्यावी, असं आवाहन त्यांनी केलं. “प्रांजल खेवलकर यांच्या लॅपटॉप आणि पेन ड्राइव्हमध्ये काही अश्लील व्हिडिओ सापडले आहेत. पीडित महिलेला कल्पना न देता तिचे लैंगिक कृत्य रेकॉर्ड केल्याचा आरोप आहे. हे सेक्स रॅकेट उघड झाल्यास, ते महाराष्ट्रातील सर्वात मोठे सेक्स रॅकेट ठरू शकते. या प्रकरणात अनेक महिला तक्रार दाखल करण्यासाठी पुढे येत आहेत. त्यामुळे परिस्थिती गंभीर आहे. अशा महिलांना संरक्षण देणे आवश्यक आहे. अत्याचार झालेल्या महिलेचे वाईट अवस्थेतील फोटो आणि व्हिडिओ काढण्यात आले आहेत. त्यामुळे ती भयभीत आहे. तिला दिलासा देणे आपले कर्तव्य आहे,” असंही चाकणकर म्हणाल्या.