डोंबिवली पश्चिम परिसरात दोन गटात राडा; मागील विधानसभा निवडणुकीतील आग बाहेर, विष्णूनगर पोलीस ठाण्यात परस्परविरोधी गुन्हे दाखल
डोंबिवली – गेल्या विधानसभा निवडणुकीत वाद झाला होता मात्र त्याचे पडसाद आता उमटले आहेत. माजी नगरसेवक विकास म्हात्रे आणि मेघराज तुपांगे यांच्या समर्थकांमध्ये हा राडा झाल्याची माहित आहे. या राड्यात पाच जण जखमी झाले आहेत. या प्रकरणी विष्णू नगर पोलिसांनी चार जणांना अटक केली आहे. दोन्ही गटांनी एकमेकांवर गंभीर आरोप केले आहेत. विष्णूनगर पोलिसांकडून गुन्हा दाखल करण्यात आला आहे.
डोंबिवली पश्चिमेतील राजुनगर खंडोबा मंदिर परिसरात व्यावसायिक मिलिंद देशमुख यांचे कार्यालय आहे. या ठिकाणी विकास म्हात्रे काही कामानिमित्त शनिवारी रात्री गेले असता त्याचवेळी मेघराज तुपांगे हे देखील त्याठिकाणी आले. मेघराज तुपांगे यांचा म्हात्रे यांच्या पोलिस अंगरक्षकासोबत वाद झाला. मेघराज तुपांगे यांनी आरोप केला की, त्याठिकाणी आपल्याला धमकी देण्यात आली. मी कार्यालयाबाहेर पडलो त्यादरम्यान विकास म्हात्रे यांच्या सांगण्यावरून माझ्यावर आणि माझ्या मित्रावर प्राणघातक हल्ला करण्यात आला असे तुपांगे यांनी सांगितले. तलवार, रॉड आणि लाकडी काठ्या घेऊन दहा ते पंधरा जणांनी आपल्यावर आणि मित्रांवर प्राणघातक हल्ला करून आपल्याला कायमचे संपून टाकण्याचा त्यांचा प्रयत्न होता. या हल्ल्यात आपली सोन्याची चैनदेखील चोरण्यात आली. निवडणुकीचा राग माझ्यावर काढण्यात आला. माझी काही चुकी नसताना हा हल्ला केला आहे. त्यांच्यामुळे माझ्या जीविताला धोका आहे. माझ्यावर अन्याय झाला आहे पोलिसांकडून मला न्याय मिळेल अशी मला आशा असल्याचे तुपांगे यांनी सांगितले. याबाबत विकास म्हात्रे म्हणाले की, देशमुख यांच्या कार्यालयात गेलो होतो त्यावेळी माझ्या पोलिस अंगरक्षकाला तुपांगे यांनी शिवीगाळ केली. त्यानंतर, अंगरक्षकासोबत स्थानिक पोलीस ठाण्यात जावून तक्रार दाखल केली. अर्ध्या तासानंतर तुपांगे यांनी त्यांच्या समर्थकासह आमच्या कार्यकर्त्यांवर हल्ला केला. याप्रकरणी पोलिसांनी दोन्ही गटाच्या तक्रारीवरून परस्परविरोधी गुन्हा दाखल केला आहे. मेघराज तुपांगे यांच्या तक्रारीवरून ओमकार म्हात्रे, प्रमोद चव्हाण, महेश चव्हाण, अजय गोलतकर आणि अखिल निंबाळकर यांच्याविरोधात गुन्हा दाखल केला आहे. यात मेघराज तुपांगे, विशाल म्हात्रे आणि शत्रुघ्न मढवी हे तिघे जखमी आहेत. तर, अजय गोलतकर यांच्या तक्रारीवरून मेघराज तुपांगे, उमेश भोईर, शत्रुघ्न मढवी, विशाल म्हात्रे, अशोक म्हात्रे यांच्यावर गुन्हा दाखल करण्यात आला आहे. विष्णूनगर पोलीस याप्रकरणी अधिक तपास करीत आहेत.