पोलीस उपनिरीक्षक असल्याची लोणकडी थाप, तरुणीला ब्लॅकमेल करून पैसे उकळणाऱ्या तरुणावर गुन्हा
वाकड – इन्स्टाग्रामवर ओळख झालेल्या तरुणीला पोलीस उपनिरीक्षक असल्याचे सांगून ओळख वाढवून तिच्याकडून वेळोवळी पैसे उकळले तसेच तरुणीला ब्लॅकमेल करुन आणखी पैशांची व शारीरिक सुखाची मागणी केल्याप्रकरणी एका तरुणावर गुन्हा दाखल करण्यात आला आहे. याप्रकरणी तरुणीने वाकड पोलिस ठाण्यात फिर्याद दिली असून शुभम राठोड (३०, रा. चिंचवड) याच्यावर ३५४(ड), ३८४, ३८५, १७०, ५०६ सह आयटी कायद्यानुसार गुन्हा दाखल करण्यात आला आहे.
पोलिसांनी दिलेल्या माहितीनुसार, शुभम याने ‘पीएसआय शुभम राठोड’ या नावाच्या इन्स्टाग्राम आयडीवरून दुसऱ्याच एका पीएसआयचा फोटो वापरून त्यावरून व्हाटसअप तसेच काॅल करून तरुणीशी संपर्क साधला. पीएसआय असल्याचे सांगून त्याने तरुणीशी ओळख वाढविली. तिच्याशी लग्न करायचे आहे, असे सांगून तिचे फोटो प्राप्त केले. ते फोटो व चॅटिंग व्हायरल करण्याची धमकी देऊन तिच्याकडून वेळोवेळी फोन पे व्दारे आठ हजार आठशे रुपये ब्लॅकमेल करून घेतले. त्यानंतर आणखी पैशांची मागणी केल्याने तरुणीने त्याला नकार दिला. त्यामुळे शुभम याने वारंवार फोनवरून, व्हाटसअपवरून लग्नाची, शारीरिक सुखाची व पैशांची मागणी केली. त्यामुळे तरुणीने पोलिसांकडे धाव घेत तक्रार दिली. सहायक पोलीस निरीक्षक अर्जून पवार तपास करीत आहेत.