रबाळ्यात मोटरसायकलस्वार तरुणाला मारहाणीचा आरोप; एपीआय तुषार गुरव यांचा व्हिडिओ व्हायरल
पोलीस महानगर नेटवर्क
नवी मुंबई : रबाळे परिसरात एका मोटरसायकलस्वार तरुणाला कथितपणे मारहाण केल्याचा व्हिडिओ समोर आल्याने परिसरात चिंतेचे वातावरण निर्माण झाले आहे. व्हायरल झालेल्या या व्हिडिओमध्ये सहाय्यक पोलीस निरीक्षक (एपीआय) तुषार गुरव यांनी संबंधित तरुणाला मारहाण केल्याचा आरोप करण्यात येत आहे.
सूत्रांच्या माहितीनुसार, संबंधित युवक चुकीच्या दिशेने वाहन चालवत होता. वाहतूक नियमांचे उल्लंघन केल्यामुळे पोलिसांनी त्याला अडविले असता हा प्रकार घडल्याचे सांगितले जात आहे. मात्र, वाहतूक नियमांचे पालन करवून घेणे ही पोलिसांची जबाबदारी असली तरी कोणत्याही परिस्थितीत शारीरिक हिंसा योग्य ठरू शकत नाही, अशी प्रतिक्रिया नागरिकांकडून व्यक्त होत आहे.
व्हिडिओ सोशल मीडियावर मोठ्या प्रमाणात व्हायरल झाल्यानंतर या घटनेची चर्चा सुरू झाली असून नागरिकांमध्ये नाराजीचे वातावरण आहे. संबंधित अधिकाऱ्याने अधिकाराचा गैरवापर केल्याचा आरोप करत संपूर्ण प्रकरणाची निष्पक्ष चौकशी करण्याची मागणी होत आहे.
दरम्यान, या प्रकरणात वरिष्ठ पोलीस अधिकाऱ्यांनी अद्याप अधिकृत भूमिका स्पष्ट केलेली नाही. मात्र, आरोपांची सत्यता तपासून योग्य ती कारवाई केली जाईल, अशी अपेक्षा नागरिकांकडून व्यक्त होत आहे.
आरोप खरे ठरल्यास संबंधित अधिकाऱ्यावर कठोर कारवाई करण्यात यावी, जेणेकरून कायद्यावरील लोकांचा विश्वास अबाधित राहील, अशी मागणी स्थानिक नागरिकांनी केली आहे.