अहिल्यानगरात बनावट ओळखपत्रांचा स्फोट; बनावट मतदार ओळखपत्रांसह दोघांना रंगेहाथ पकडलं
योगेश पांडे / वार्ताहर
अहिल्यानगर: अहिल्यानगर महापालिका निवडणुकीच्या पार्श्वभूमीवर शहरात लोकशाहीवर थेट घाला घालणारा धक्कादायक प्रकार उघडकीस आला आहे. प्रभाग क्रमांक-३ मधील आनंद विद्यालय मतदान केंद्रावर बनावट निवडणूक ओळखपत्रांच्या आधारे मतदान करण्याचा प्रयत्न करणाऱ्या दोघांना रंगेहाथ पकडण्यात आले आहे. त्यामुळे संपूर्ण परिसरात खळबळ उडाली आहे.
मतदान सुरू असतानाच संशयास्पद हालचाली आढळल्याने या दोघांची झडती घेण्यात आली. यावेळी त्यांच्या ताब्यातून वेगवेगळ्या नावांची शेकडो बनावट निवडणूक ओळखपत्रे सापडली.ही ओळखपत्रे अत्यंत शिताफीने आणि हुबेहूब तयार करण्यात आल्याचे दिसून येत असून, मोठ्या प्रमाणावर मतदान प्रक्रियेत घोळ करण्याचा सुनियोजित कट रचण्यात आला होता का? असा गंभीर प्रश्न निर्माण झाला आहे.
या प्रकाराची माहिती मिळताच मतदान केंद्रावर उपस्थित उमेदवार आणि त्यांच्या प्रतिनिधींनी तीव्र संताप व्यक्त करत लोकशाहीला काळीमा फासणारा प्रकार असल्याचे सांगितलं.
तात्काळ सखोल चौकशीची मागणी करताच मतदान केंद्रावर काही काळ तणावाचे वातावरण निर्माण झाले. घटनेची गंभीर दखल घेत पोलिसांनी त्वरित कारवाई करत दोघांनाही ताब्यात घेतले आहे.बनावट ओळखपत्रं कोणी तयार केली? यामागे संघटित टोळी आहे का? एखाद्या उमेदवाराचा थेट संबंध आहे का? या सर्व बाजूंनी तपास सुरू असून, या प्रकरणामुळे शहरातील राजकीय वातावरण अधिकच तापले आहे.
दरम्यान, निवडणूक अधिकाऱ्यांनी मतदान प्रक्रिया पारदर्शक आणि सुरळीत सुरू असल्याचं स्पष्ट केलं असून कोणत्याही गैरप्रकाराला मुळीच खपवून घेतलं जाणार नाही, असा इशाराही दिला आहे. लोकशाहीच्या लढाईत हा बनावटपणाचा खेळ कोणाचा, खरे सूत्रधार कोण, असा प्रश्नही विचारला जात आहे.