आई अंगणात बसलेली असताना मुलाने छतावरून गोळी झाडली; सिंधुदुर्गमध्ये धक्कादायक घटना
पोलीस महानगर नेटवर्क
सिंधुदुर्ग : पोटच्या मुलानेच जन्मदात्या आईची गोळी झाडून हत्या केल्याची धक्कादायक घटना सिंधुदुर्ग जिल्ह्यात घडली आहे. वेंगुर्ला तालुक्यातील अणसूर गावात बुधवारी रात्री हा प्रकार घडला. वासंती वासुदेव सरमळकर (वय ६५) असे मृत्यू झालेल्या महिलेचे नाव असून, या प्रकरणी त्यांचा मुलगा उमेश सरमळकर याच्यावर संशय व्यक्त करण्यात आला आहे. पोलिसांनी आरोपीला ताब्यात घेण्याची कारवाई सुरू केली आहे.
पोलिसांनी दिलेल्या माहितीनुसार, वासंती सरमळकर आणि त्यांचा मुलगा उमेश यांच्यात दीर्घकाळापासून कौटुंबिक वाद सुरू होते. उमेश हा कर्जबाजारी असून त्याने विविध बँका आणि बचत गटांकडून कर्जे घेतली होती. आर्थिक अडचणींवरून मायलेकांमध्ये वारंवार वाद होत असल्याचे समोर आले आहे.
बुधवारी रात्री वासंती सरमळकर या घरासमोरील अंगणात बसलेल्या असताना, उमेशने छतावरून बंदुकीतून गोळी झाडल्याचा आरोप आहे. ही गोळी थेट त्यांच्या छातीत घुसल्याने त्या गंभीर जखमी झाल्या. घटनास्थळीच त्यांचा मृत्यू झाला.
या प्रकरणी जागृती जयेश सरमळकर यांनी वेंगुर्ला पोलीस ठाण्यात फिर्याद दिली आहे.वपोलिसांनी गुन्हा नोंदवून आरोपीचा शोध सुरू केला असून, घटनेचा अधिक तपास वेंगुर्ला पोलीस करत आहेत. या घटनेमुळे परिसरात एकच खळबळ उडाली आहे.