पालघर : घरफोडीचा गुन्हा उघड; सफाळा पोलिसांची उल्लेखनीय कामगिरी
पोलीस महानगर नेटवर्क
पालघर : पालघर जिल्ह्यातील केळवे रोड परिसरात झालेल्या घरफोडीच्या गुन्ह्याचा उलगडा करण्यात पालघर पोलीस दलाला यश आले असून सफाळा पोलीस ठाण्याच्या पथकाने अवघ्या काही दिवसांत आरोपीला अटक करून चोरीस गेलेला संपूर्ण मुद्देमाल जप्त केला आहे.
केळवे रोड (पूर्व) येथील देवीपाडा परिसरात जागमाता मंदिराजवळ राहणारे विमल कुमार छोटेलाल पासवान (वय ३८, व्यवसाय मजुरी) यांच्या घरात २ जानेवारी रोजी अज्ञात चोरट्याने खिडकी तोडून प्रवेश करत घरफोडी केली होती. या घरफोडीत आयटेल कंपनीचे दोन मोबाईल फोन आणि सोन्याचे मंगळसूत्र असा एकूण ६८ हजार रुपयांचा मुद्देमाल चोरीस गेला होता. याप्रकरणी सफाळा पोलीस ठाण्यात गुन्हा दाखल करण्यात आला होता.
गुन्ह्याचे गांभीर्य लक्षात घेऊन पोलीस अधीक्षक यतिश देशमुख यांच्या सूचनेनुसार तपासाला गती देण्यात आली. गोपनीय माहितीच्या आधारे पोलिसांनी हारुन कादर शेख (वय २३, रा. पालघर) याला ताब्यात घेतले. चौकशीत आरोपीने घरफोडी केल्याची कबुली दिल्यानंतर त्याच्याकडून चोरीस गेलेले सोन्याचे मंगळसूत्र आणि दोन मोबाईल फोन असा संपूर्ण मुद्देमाल जप्त करण्यात आला.
या यशस्वी कारवाईमुळे घरफोडीचा गुन्हा उघडकीस आला असून पुढील तपास वरिष्ठांच्या मार्गदर्शनाखाली सुरू असल्याची माहिती पोलिसांनी दिली आहे.
ही कारवाई पोलीस अधीक्षक यतिश देशमुख, अपर पोलीस अधीक्षक विनायक नरळे आणि उपविभागीय पोलीस अधिकारी विकास नाईक यांच्या मार्गदर्शनाखाली पार पडली. तपासात सफाळा पोलीस ठाण्याचे प्रभारी अधिकारी दत्ता शेळके यांच्यासह पोलीस उपनिरीक्षक दीपविजय भवर, सफौ सचिन महापदी, पोहवा कल्पेश किणी, नीरज शुक्ला व पोअं शिवाजी चिमकर यांनी महत्त्वाची भूमिका बजावली.