गावठी कट्टा, धारदार शस्त्रांसह दोघे ताब्यात; पंचवटी पोलिसांच्या गुन्हेशोध पथकाची धडक कारवाई
पोलीस महानगर नेटवर्क
नाशिक : पंचवटी पोलिस ठाणे हद्दीत प्रतिबंधात्मक कारवाईदरम्यान गावठी कट्टा व धारदार शस्त्र बाळगणाऱ्या दोघांना पंचवटी पोलिसांच्या गुन्हेशोध पथकाने अटक केली. संभाव्य गंभीर गुन्ह्याची तयारी सुरू असल्याचे या कारवाईत उघड झाले आहे.
परिसरात गुन्हे प्रतिबंधक पेट्रोलिंग सुरू असताना हवालदार महेश नांदुर्डीकर यांना अमरधाम रोडवरील कन्नमवार पुलाखाली दोन व्यक्ती शस्त्रांसह संशयास्पद हालचाली करत असल्याची गोपनीय माहिती मिळाली. ही माहिती त्यांनी वरिष्ठ पोलिस निरीक्षक गजेंद्र पाटील यांना कळविताच तातडीने कारवाईचे आदेश देण्यात आले. सहायक पोलिस निरीक्षक सतिश शिरसाठ यांच्या नेतृत्वाखाली गुन्हेशोध पथक घटनास्थळी दाखल झाले.
पोलिसांना पाहताच संशयितांनी पळ काढण्याचा प्रयत्न केला; मात्र पथकाने पाठलाग करून दोघांना ताब्यात घेतले. चौकशीत अक्षय अविनाश जाधव (वय १९, रा. म्हाडा इमारत, कक्ष क्र. ५०२, बी-विंग, जत्रा हॉटेलजवळ, आडगाव, नाशिक) असे एका संशयिताचे नाव निष्पन्न झाले. त्याचा साथीदार विधीसंघर्षित बालक असल्याचे स्पष्ट झाले. पंचासमक्ष अंगझडतीत त्यांच्याकडून देशी बनावटीचा गावठी कट्टा आणि लोखंडी कोयता जप्त करण्यात आला.
या प्रकरणी पोलिस कर्मचारी अमोल देशमुख यांच्या फिर्यादीवरून पंचवटी पोलिस ठाण्यात गुन्हा दाखल करण्यात आला असून पुढील तपास सहायक पोलिस निरीक्षक सतिश शिरसाठ करीत आहेत.
ही कारवाई पोलिस आयुक्त संदीप कर्णिक, पोलिस उपायुक्त (परिमंडळ-१) मोनिका राऊत, सहायक पोलिस आयुक्त (पंचवटी विभाग) शेखर देशमुख आणि वरिष्ठ पोलिस निरीक्षक गजेंद्र आर. पाटील यांच्या मार्गदर्शनाखाली करण्यात आली.