फायनान्सच्या नावाखाली चोरीचा धंदा!
बीड पोलिसांनी दुचाकी चोरीच्या मोठ्या रॅकेटचा केला पर्दाफाश; मास्टरमाइंड जेरबंद, ८ गाड्या जप्त
योगेश पांडे / वार्ताहर
बीड – बीड शहर आणि परिसरातील वाढत्या दुचाकी चोरीच्या घटनांना आळा घालण्यासाठी बीड शहर पोलिसांनी केलेल्या विशेष कारवाईत एका मोठ्या रॅकेटचा पर्दाफाश झाला आहे. या कारवाईत पोलिसांनी एका आरोपीला अटक करून त्याच्याकडून तब्बल आठ चोरीच्या दुचाकी जप्त केल्या आहेत. या प्रकरणी अटक करण्यात आलेल्या आरोपीचे नाव कृष्णा उमेश अंतरकर (२५)असे आहे. प्राथमिक तपासात आरोपीची धक्कादायक पार्श्वभूमी उघड झाली आहे. आरोपी कृष्णा अंतरकर हा यापूर्वी एका फायनान्स कंपनीत कार्यरत होता. त्याचे काम हप्ते थकवलेल्या दुचाकी गाड्या ओढून आणण्याचे होते. याच कामातून त्याला वाहन उचलण्याचे चोरी करण्याचे कौशल्य आणि सवय लागली. फायनान्स कंपनीतील कौशल्याचा सवय लागली. फायनान्स कंपनीतील कौशल्याचा गैरवापर करत आरोपीने दुचाकी चोरी करण्यास सुरुवात केली. विशेष म्हणजे, चोरी केलेल्या या मोटारसायकली तो थेट पाथर्डी परिसरात विकत असे. ग्राहकांचा विश्वास संपादन करण्यासाठी आरोपी स्वतःला फायनान्स मध्ये काम करणारा अशी ओळख देत असे. या गाड्या हप्ते थकित असल्याने फायनान्स कंपनीकडून ओढून आणलेल्या आहेत, अशी खात्री देऊन तो ग्राहकांना कमी किमतीत दुचाकी विकत होता.
आरोपीच्या या फायनान्सच्या ओळखीवर विश्वास ठेवून अनेक नागरिकांनी ह्या गाड्या विकत घेतल्या. मात्र, बीड पोलिसांनी तपास केल्यावर त्या सर्व गाड्या चोरीच्या असल्याचे निष्पन्न झाले आणि त्या जप्त करण्यात आल्या. यामुळे संबंधित खरेदीदारांचे दुचाकी गमवण्यासोबतच दिलेले पैसेही गमवावे लागले, अशाप्रकारे नागरिकांचे दुहेरी आर्थिक नुकसान झाले आहे.
मोटारसायकल चोरीच्या गुन्ह्यांचा छडा लावण्यासाठी बीड शहर पोलीस ठाण्याच्या अँड पथकाने तांत्रिक विश्लेषण आणि गुप्त माहितीच्या आधारे तपास केला. याच प्रयत्नातून आरोपी कृष्णा अंतरकर याला अटक करण्यात आली आणि त्याच्याकडून विविध ठिकाणांहून चोरीस गेलेल्या आठ दुचाकी हस्तगत करण्यात आल्या.
या कारवाईमुळे शिवाजीनगर पोलीस ठाणे आणि बीड शहर पोलीस ठाणे हद्दीतील २४ मोटारसायकल चोरीचे गुन्हे उघडकीस झाले आहेत.तरी या प्रकरणाचा तपास सुरू असून, आरोपीचा आणखी गुन्ह्यांमध्ये सहभाग सिद्ध होण्याची शक्यता आहे.
सदर कारवाई पोलीस अधीक्षक नवनीत काँवत यांच्या मार्गदर्शनाखाली, अपर पोलीस अधीक्षक सचिन पांडकर आणि उपविभागीय पोलीस अधिकारी पूजा पवार यांच्या यांच्या मार्गदर्शनाखाली पोलीस निरीक्षक शीतलकुमार बल्लाळ यांच्या नेतृत्वाखालील पोलीस उपनिरीक्षक महेश जाधव, पोलीस अंमलदार गहिनीनाथ बावनकर, राम पवार, शेख, मंगेश शिंदे आणि शौकत शेख तसेच बीड शहर पोलीस ठाण्याच्या डिटेक्शन पथकातील इतर अधिकारी व अंमलदारांनी योगदान दिले.