वहिनीसोबतच्या अनैतिक संबंधाच्या रागातून सख्ख्या भावाचा दगडाने ठेचून खून; पनवेल पोलिसांची एका तासात आरोपीवर शिताफीने कारवाई
पोलीस महानगर नेटवर्क
पनवेल – शहरातील करंजाडे सेक्टर-७ भागात घडलेल्या धक्कादायक घटनेने परिसरात खळबळ उडाली आहे. वहिनीसोबत अनैतिक संबंध असल्याच्या रागातून सख्ख्या भावानेच दगडाने ठेचून भावाचा खून केल्याची घटना गुरुवारी उघडकीस आली. विशेष म्हणजे, पनवेल शहर पोलीस ठाण्याच्या बिट मार्शल पथकाने केवळ एका तासाच्या आत आरोपीला जेरबंद करून गुन्हा उघडकीस आणला आहे.
घटनास्थळावरील माहितीनुसार, २७ सप्टेंबर रोजी रात्री ८:३७ वाजता डायल-११२ वरून करंजाडे सेक्टर-७ पोलिस चौकीसमोरील रस्त्यावर ४५ वर्षीय पुरुषाचा दगडाने ठेचून खून झाल्याची माहिती मिळाली. तत्काळ बिट मार्शल पथक घटनास्थळी दाखल झाले. पोलिस अंमलदार विलास बिराजी कारंडे व राजेंद्र कृष्णा केणी यांनी नागरिकांकडून माहिती गोळा करून आरोपीचा शोध सुरू केला.
दरम्यान, नागेश वाल्या काळे हा पळून जाण्याचा प्रयत्न करत असताना पोलिसांच्या हाती लागला. कसून चौकशीत त्याने आपल्या सख्ख्या भावाचा, दत्तु वाल्या काळे याचा खून केल्याची कबुली दिली. दत्तुचे आपल्या चुलत भावाच्या पत्नीशी अनैतिक संबंध असल्याचे समजताच नागेश संतापला होता. संतापाच्या भरात त्याने दत्तुच्या डोक्यात दगड घालून त्याला ठार केले.
या प्रकरणी पनवेल शहर पोलीस ठाण्यात गुन्हा दाखल करण्यात आला असून आरोपी नागेश काळेला अटक करण्यात आली आहे. पोलिसांनी त्याला न्यायालयात हजर करून पोलीस कोठडीची मागणी करण्याची तयारी सुरू केली आहे.