आमदाराच्या भरधाव गाडीने युवकाला चिरडले; युवक कोमात, नागरिक संतप्त, गुन्हा दाखल
पोलीस महानगर नेटवर्क
बुलढाणा : अमरावती विभागीय शिक्षक मतदारसंघाचे आमदार किरण सरनाईक यांच्या भरधाव इनोव्हा गाडीने दिलेल्या धडकेत एका २५ वर्षीय युवकाचा जीव धोक्यात आला असून तो सध्या कोमात आहे. गुरुवारी (दि. १८ सप्टेंबर) चिखली शहरातील पानगोळे हॉस्पिटलसमोर घडलेल्या या अपघातामुळे परिसरात तणावाचे वातावरण निर्माण झाले आहे. प्राप्त माहितीनुसार, पायी जाणारा कृष्णा नंदू लष्कर (रा. गौरक्षण वाडी, चिखली, वय २५) याला सरनाईक यांच्या गाडीने जोरदार धडक दिली. अपघातानंतर युवक गंभीर जखमी होऊन कोमात गेला आहे. घटनास्थळावरून आमदार किरण सरनाईक यांनी तत्काळ आपल्या वाहनाने जखमी युवकास चिखलीतील जवंजाळ हॉस्पिटल येथे दाखल केले.सध्या त्याच्यावर उपचार सुरू आहेत.
अपघाताच्या वेळी आमदार सरनाईक हे राष्ट्रवादी काँग्रेस (शरद पवार गट) नेते व माजी मंत्री डॉ. राजेंद्र शिंगणे यांच्या घरी जात होते. शिंगणे यांच्या मातोश्रींचे नुकतेच निधन झाल्याने ते शोकसंवेदना व्यक्त करण्यासाठी निघाले होते. या घटनेनंतर नागरिकांनी संताप व्यक्त केला असून, लोकप्रतिनिधी आणि अधिकाऱ्यांच्या वाहनांच्या वेगावर नियंत्रण आणावे, अपघातग्रस्तांना तातडीने मदत करण्याची जबाबदारी निश्चित करावी, अशी मागणी केली आहे.
या अपघात प्रकरणी चिखली पोलिस ठाण्यात गुन्हा दाखल करण्याची प्रक्रिया सुरू असल्याचे ठाणेदार संग्राम पाटील यांनी सांगितले. अपघातास कारणीभूत इनोव्हा कार पोलिसांच्या ताब्यात असून, वाहनचालकास अटक करण्यात आली आहे. या घटनेने चिखलीसह संपूर्ण बुलढाणा जिल्ह्यात खळबळ उडाली आहे.