परताव्याचे आमिष दाखवून व्यावसायिकाची १ कोटी १२ लाखांची फसवणूक; औषधाच्या बहाण्याने दाम्पत्यालाही गंडा
पोलीस महानगर नेटवर्क
पुणे : राज्यात फसवणुकीच्या घटना दिवसेंदिवस वाढत असून विविध पद्धतींनी नागरिकांना लाखोंवर गंडा घातला जात आहे. नुकत्याच समोर आलेल्या दोन प्रकरणांनी नागरिकांमध्ये मोठी खळबळ उडाली आहे.
गुंतवणुकीच्या नावाखाली १ कोटी १२ लाखांचा गंडा
पुण्यातील बाणेर भागात राहणाऱ्या व्यावसायिकाची तब्बल १ कोटी १२ लाख रुपयांची फसवणूक झाल्याची घटना उघडकीस आली आहे. या प्रकरणी राजीव अशोक केंद्रे (रा. एलेजियम सोसायटी, पिंक सिटी रस्ता, वाकड) याच्यावर गुन्हा दाखल करण्यात आला आहे.
तक्रारदार हा रावेत भागातील असून व्यावसायिक आहे. त्याची दोन वर्षांपूर्वी केंद्रेशी ओळख झाली होती. केंद्रे याचे बाणेर येथे खासगी कार्यालय असून त्याने तक्रारदाराला शेअर बाजार व परकीय चलन व्यवहार (फॉरेक्स ट्रेडिंग) यामध्ये गुंतवणूक करण्याचे आमिष दाखवले. सुरुवातीला परतावा दिल्यानंतर हळूहळू तो बंद केला. त्यानंतर तक्रारदाराने पोलिसांकडे धाव घेतली. सहायक पोलीस निरीक्षक मोहिते या प्रकरणाचा तपास करत आहेत.
मूल होण्याचे औषध देण्याच्या नावाखाली दाम्पत्याची फसवणूक
दरम्यान, आणखी एका प्रकरणात पुणे जिल्ह्यातील इंदापूर तालुक्यातील निमनिरगाव येथील नागेश राजू निकम (वय ३६) या भोंदूबाबाने दाम्पत्याची फसवणूक केली. मूल होण्याचे औषध देण्याचे आमिष दाखवून त्याने धार्मिक विधीचे नाटक रचले. विधी दरम्यान महिलेचे सर्व दागिने एका हंड्यात ठेवण्यास सांगून तो मंदिरात जात असल्याचे कारण देऊन पसार झाला.
या फसवणुकीनंतर स्थानिक गुन्हे अन्वेषण विभागाने वेगाने कारवाई करत निकमला अटक केली. पोलिसांनी त्याच्याकडून ५ लाख ८७ हजार रुपयांचा मुद्देमाल जप्त केला आहे.
नागरिकांना आवाहन
गुंतवणूक, धार्मिक विधी किंवा औषधोपचाराच्या नावाखाली होणाऱ्या फसवणुकीपासून सावध राहण्याचे आवाहन पोलिसांनी केले आहे. परताव्याचे आमिष किंवा चमत्कारीक उपाययोजनांवर विश्वास ठेवू नये, असेही त्यांनी स्पष्ट केले.