बीडमध्ये पुन्हा अमानुष हत्याकांड; १९ वर्षीय तरुणाची दगडाने ठेचून अमानुष हत्या
योगेश पांडे / वार्ताहर
बीड – गेल्या काही दिवसांपासून बीडसह आसपासच्या भागात गुन्हेगारीच्या विविध घटना समोर येत आहेत. काही दिवसांपासून इथं मस्साजोगचे सरपंच संतोष देशमुख यांची सुदर्शन घुले गँगने अमानुष हत्या केली होती. हत्येच्या या घटनेचे संपूर्ण महाराष्ट्रात पडसाद उमटले होते. ही घटना ताजी असताना आता बीड जिल्हा पुन्हा एकदा एका तरुणाच्या हत्येनं हादरला आहे. गुरुवारी मध्यरात्री बीडमध्ये एका तरुणाची दगडाने ठेचून हत्या केली आहे. ही घटना बीड जिल्ह्यातील दगडवाडी इथं घडली. दीपक केरा भिल्ला असं हत्या झालेल्या १९ वर्षीय मेंढपाळाचं नाव आहे. त्याची दगडाने ठेचून हत्या करण्यात आली. या घटनेमुळे परिसरात खळबळ उडाली असून, आरोपी फरार झाला आहे. पोलिसांनी गुन्हा दाखल करत आरोपीचा शोध घेण्यासाठी पथके रवाना केली आहेत.
दीपक केरा भिल्ला (१९) असे खून झालेल्या मेंढपाळाचे नाव आहे. तो मूळचा मध्य प्रदेशातील बऱ्हाणपूर येथील रहिवासी होता. कामासाठी तो नाशिक येथे मेंढपाळ म्हणून काम करत होता. सध्या त्याच्या मेंढ्या बीड जिल्ह्यातील पाटोदा पोलीस ठाण्याच्या हद्दीतील दगडवाडी शिवारात होत्या. पहाटेच्या सुमारास अज्ञात व्यक्तीने दगडाने ठेचून त्याची हत्या केली. या हत्येचे नेमके कारण अद्याप समोर आलेले नाही. खून केल्यानंतर आरोपी घटनास्थळावरून पसार झाला आहे. घटनेची माहिती मिळताच वरिष्ठ पोलीस अधिकारी तातडीने घटनास्थळी दाखल झाले. या प्रकरणाचा तपास पाटोदा पोलीस करत आहेत. आरोपीचा शोध घेण्यासाठी पोलिसांची पथके तयार करण्यात आली आहेत. बीड जिल्ह्यात वाढलेल्या गुन्हेगारीमुळे आणि हत्यांच्या घटनांमुळे कायदा आणि सुव्यवस्थेवर प्रश्नचिन्ह निर्माण झाले आहे. या घटनेमुळे नागरिकांमध्ये भीतीचे वातावरण आहे.