ठाणे पोलीस आयुक्तालयात ‘तक्रार निवारण दिन’ जल्लोषात; ७४२ अर्जांचा तात्काळ निपटारा, नागरिकांचे समाधान व्यक्त
पोलीस महानगर नेटवर्क
ठाणे : १०० दिवसांच्या कृती आराखड्याचा भाग म्हणून ठाणे पोलीस आयुक्तालयात ९ व १० ऑगस्ट २०२५ रोजी ‘तक्रार निवारण दिन’ मोठ्या उत्साहात पार पडला. नागरिकांच्या तक्रारींना त्वरित न्याय मिळावा आणि पोलीस-नागरिक संवाद अधिक बळकट व्हावा, यासाठी हा विशेष उपक्रम आयोजित करण्यात आला. कार्यक्रमासाठी एकूण १,२०६ अर्जदारांना आमंत्रित करण्यात आले होते. त्यापैकी ८१४ अर्जदार स्वतः उपस्थित राहून आपल्या तक्रारी मांडल्या. या वेळी ठाणे पोलीस आयुक्तालयातील सर्व सहाय्यक पोलीस आयुक्त, वरिष्ठ पोलीस निरीक्षक, पोलीस निरीक्षक आणि इतर अधिकारी उपस्थित होते.
अर्जदारांच्या उपस्थितीत ७४२ अर्जांचा तात्काळ निपटारा करण्यात आला. उर्वरित अर्जांचे निरसन लवकरच करण्यात येणार असल्याची माहिती अधिकाऱ्यांनी दिली. नागरिकांच्या समाधानासाठी तक्रारींचे प्रत्यक्ष स्थळीच निरसन केल्यामुळे हजर नागरिकांनी समाधान व्यक्त करत ठाणे शहर पोलीसांचे आभार मानले. या उपक्रमामुळे पोलीस यंत्रणेविषयी जनतेत विश्वास आणि आत्मीयता अधिक वाढल्याचेही मत व्यक्त करण्यात आले असे वरिष्ठ पोलीस निरीक्षक तथा जनसंपर्क अधिकारी शैलेश साळवी, ठाणे शहर पोलीस आयुक्तालय यांनी कळविले आहे.