तोतया पोलिस अधिकाऱ्यांकडून महिलेला सायबर फसवणूक; ४ लाखांची लुबाडणूक
पोलीस महानगर नेटवर्क
मुंबई : मुंबईच्या घाटकोपर परिसरात एका महिलेला बनावट पोलिस अधिकाऱ्यांनी सायबर गुन्ह्यात अडकवून तब्बल ४ लाख रुपयांची फसवणूक केल्याचा धक्कादायक प्रकार उघडकीस आला आहे. पोलिस अधिकाऱ्यांच्या नावाचा गैरवापर करत महिलेला धमकी दिली जात होती की तिच्याविरोधात गंभीर गुन्हा दाखल आहे आणि सीबीआय चौकशी होणार आहे.
अंधेरीत कार्यरत असलेल्या पीडित महिलेला १९ जुलै रोजी दुपारी १२:३० वाजता एका अनोळखी क्रमांकावरून फोन आला. कॉल करणाऱ्याने स्वतःची ओळख पोलिस अधिकारी म्हणून करून दिली आणि सांगितले की तिच्या आधार कार्डाचा वापर करून बनावट बँक खाती उघडली गेली असून ती एका आर्थिक घोटाळ्यात सहभागी आहे. यानंतर तिला व्हिडीओ कॉल करण्यात आला ज्यामध्ये पोलिस गणवेश परिधान केलेले दोन पुरुष दिसून आले. त्यांनी स्वतःला गुन्हे शाखेचे डीसीपी दया नायक आणि प्रमोद वर्मा असल्याचे सांगितले. तसंच, पुढील तपास सीबीआय अधिकारी रश्मी शुक्ला करतील असेही तिला सांगण्यात आले. महिलेला सर्वोच्च न्यायालयाची नोटीस, अटक वारंट आणि गंभीर कारवाईची धमकी देण्यात आली.
या सर्व धमक्यांमुळे घाबरलेल्या महिलेकडून फसवणूक करणाऱ्यांनी ४ लाख रुपये ट्रान्सफर करून घेतले. दुसऱ्या दिवशी पुन्हा संपर्क साधून दुसऱ्या क्रमांकावरून व्हिडिओ कॉल केला गेला, जिथे अनेक व्यक्ती पोलिस गणवेशात बसलेले दिसले. या प्रकरणी घाटकोपर पोलिसांनी पाच अज्ञात व्यक्तींविरुद्ध फसवणूक, खोटे व्यक्तिमत्व सादर करणे आणि गुन्हेगारी धमकी या संदर्भातील भारतीय दंड विधानातील विविध कलमांन्वये गुन्हा दाखल केला आहे. पुढील तपास सुरू असून पोलिसांनी नागरिकांना अशा बनावट कॉल्सपासून सतर्क राहण्याचे आवाहन केले आहे.