गुंगीचे औषध देऊन पत्नीचे अपहरण; अश्लील व्हिडिओ काढून डान्सबारमध्ये नाचण्यास भाग पाडले
पोलीस महानगर नेटवर्क
नाशिक : पत्नीवर अमानुष अत्याचार करत गुंगीचे औषध देऊन तिचे अपहरण करण्यात आले. त्यानंतर तिचे अश्लील व्हिडिओ शूट करून सोशल मीडियावर व्हायरल करण्याची धमकी देत, तिला जबरदस्तीने डान्सबारमध्ये नाचण्यास भाग पाडल्याचा धक्कादायक प्रकार समोर आला आहे. या प्रकरणी पती आणि त्याच्या मित्राविरोधात गुन्हा दाखल करण्यात आला असून, पोलीस तपास सुरू आहे.
फिर्यादी महिला ही नाशिकमधील पंचवटी परिसरात राहणारी असून, तिच्या तक्रारीनुसार पती पवन आणि त्याचा मित्र अक्षय यांनी संगनमत करून ऑगस्ट २०२२ मध्ये तिच्या राहत्या घरी गुंगीचे औषध दिले आणि तिचे अपहरण केले. त्यानंतर तिला बंगळुरू आणि सोलापूर येथे घेऊन जाऊन तिचे अश्लील व्हिडिओ चोरपणे तयार केले. त्यानंतर हे व्हिडिओ सोशल मीडियावर व्हायरल करण्याची धमकी देत तिच्यावर मानसिक आणि शारीरिक छळ करण्यात आला. शिवीगाळ व मारहाण करत तिच्या इच्छेविरुद्ध डान्सबारमध्ये नाचकाम करण्यास भाग पाडण्यात आले.
हा संपूर्ण प्रकार २०२२ ते २१ जुलै २०२५ या कालावधीत सुरू होता. अखेर अत्याचार सहन न झाल्याने पीडित महिलेने धाडस करून पोलिसांकडे तक्रार दाखल केली. पोलिसांनी पती व त्याच्या मित्राविरोधात संबंधित भारतीय दंड विधानातील विविध गंभीर कलमांखाली गुन्हा दाखल केला आहे. पुढील तपास पोलीस उपनिरीक्षक मेमाणे करीत आहेत.