राज्यपाल सी. पी. राधाकृष्णन यांच्या हस्ते ८३ पोलीस अधिकाऱ्यांना पोलीस पदक प्रदान
मुंबई – स्वातंत्र्य दिन २०२१ व २०२२ निमित्त राष्ट्रपतींकडून जाहीर झालेली पोलीस शौर्य पदक, उल्लेखनीय सेवेबद्दल राष्ट्रपती पोलीस पदक आणि गुणवत्तापूर्ण सेवेसाठी पोलीस पदके राज्यातील ८३ पोलीस अधिकारी व अंमलदारांना राज्यपाल सी. पी. राधाकृष्णन यांच्या हस्ते सन्मानपूर्वक प्रदान करण्यात आली.
या भव्य अलंकरण समारंभाचा आयोजन आज मुंबईतील राजभवन येथील दरबार हॉलमध्ये पार पडला. एकूण ८३ पोलीस अधिकारी व जवानांना विविध श्रेणीतील पदकांनी गौरविण्यात आले. यामध्ये ४१ अधिकाऱ्यांना पोलीस शौर्य पदक, ३ अधिकाऱ्यांना उल्लेखनीय सेवेबद्दल राष्ट्रपती पोलीस पदक आणि ३९ अधिकाऱ्यांना गुणवत्तापूर्ण सेवेसाठी पोलीस पदक प्रदान करण्यात आले.
या समारंभाला गृह राज्य मंत्री (ग्रामीण) डॉ. पंकज भोयर, पोलीस महासंचालक रश्मी शुक्ला, वरिष्ठ पोलीस अधिकारी रितेश कुमार, अर्चना त्यागी, तसेच मुंबईचे पोलीस आयुक्त देवेन् भारती हे मान्यवर उपस्थित होते. गौरविण्यात आलेल्या पोलीस अधिकाऱ्यांचे कुटुंबीयही या सन्मान सोहळ्यास साक्षीदार होते.
या अलंकरण समारंभातून पोलीस दलातील शौर्य, निष्ठा आणि सेवा परंपरेचा गौरव करण्यात आला असून, या सन्मानामुळे पोलीस दलामध्ये कार्य करण्यास नवा उत्साह व प्रेरणा मिळेल, असे प्रतिपादन राज्यपालांनी याप्रसंगी केले.