धुळ्याच्या शंभर फुटी रोडवर गोळीबार करणाऱ्या आरोपींची त्याच परिसरातून पोलिसांनी काढली धिंड
योगेश पांडे / वार्ताहर
धुळे – धुळे शहरातील शंभर फुटी रोड परिसरात काही दिवसांपूर्वी झालेल्या गोळीबार प्रकरणातील दोघा आरोपींना अटक करून चाळीसगाव रोड पोलिसांनी मोठी कारवाई केली आहे.या आरोपींनी केलेल्या दहशतीला प्रत्युत्तर देत आणि नागरिकांमध्ये विश्वास निर्माण करण्याच्या उद्देशाने पोलिसांनी या दोघांची धिंड काढली. विशेष म्हणजे या प्रकरणात पोलिसांनी गोळीबार झालेल्या ठिकाणीच आरोपींचे स्पॉट व्हेरिफिकेशन करत गुन्ह्याचा पुनर्दृश्य अभ्यास केला.या धिंडीत चाळीसगाव रोड पोलीस ठाण्याचे पोलीस निरीक्षक सुरेशकुमार घुसर यांच्या मार्गदर्शनाखाली आणि उपविभागीय पोलीस अधिकारी राजकुमार उपासे यांच्या देखरेखीखाली ही कारवाई करण्यात आली. धिंड काढण्यात आलेल्या वेळी परिसरात मोठ्या प्रमाणावर नागरिकांची गर्दी झाली होती.या प्रकरणात आरोपींनी परिसरात भीतीचे वातावरण निर्माण केले होते. त्यामुळेच पोलिसांनी सार्वजनिकरित्या घटनास्थळी स्पॉट व्हेरिफिकेशन करून नागरिकांमध्ये विश्वास निर्माण करण्याचा प्रयत्न केला. पोलिसांच्या या कारवाईचे नागरिकांकडून स्वागत करण्यात येत आहे. धुळ्यात काही दिवसांपूर्वी जुन्या वादातून एका कॅफेबाहेर तरुणावर गोळीबार करण्यात आला होता. या गोळीबारात तरुण जखमी झाला होता.