जेजुरीतील शिंदे गटाच्या युवासेना प्रमुखावर खंडणी व अपहरणाचा गुन्हा दाखल, ५ लाखांची मागणी
पोलीस महानगर नेटवर्क
जेजुरी – जेजुरी शहर शिवसेनेचे (शिंदे गट) युवासेना प्रमुख ओंकार नारायण जाधव (रा. जेजुरी) व हर्षल गरुड (रा. बेलसर) यांच्यासह इतर पाचजणांवर अपहरण करणे, खंडणी मागणे, पिस्तुलाचा धाक दाखवून धमकावणे आदी गुन्ह्यांबाबत जेजुरी पोलीस ठाण्यात गुन्हा दाखल करण्यात आला आहे. याबाबत बजरंग हनुमंत पवार (रा.पवारवाडी, जेजुरी) यांनी जेजुरी पोलीस ठाण्यात फिर्याद दाखल केली आहे.
पोलिसांनी दिलेल्या माहितीनुसार, बजरंग पवार हे जेजुरीतून आपल्या दुचाकीवरून घरी निघालेले असताना त्यांच्या दुचाकीला हर्षल गरुड याने अडवले. ओंकार जाधव व इतरांनी त्यांना चारचाकी वाहनामध्ये जबरदस्तीने बसवून मावडी पिंपरी गावच्या हद्दीतील एका शेतात नेले. तेथे डोक्याला पिस्तूल लावून दमदाटी व शिवीगाळ करत पाच लाख रुपयांची मागणी केली तसेच मला माझी गॅंग सांभाळावी लागते. माझी पोरे कमरेला घोडे लावून फिरतात, तुला मारायला मला वेळ लागणार नाही. तुझे एमआयडीसीमध्ये वेस्टेज उचलण्याचा व्यवसाय आहे. मला आठ दिवसात पाच लाख रुपये द्यायचे आणि दर महिन्याला ५० हजार रुपये द्यायचे, अशी मागणी करीत आठ दिवसांत पैसे देण्याची मागणी करत पुन्हा मोरगाव चौक जेजुरी येथे आणून सोडले.
याबाबत जेजुरी पोलिस ठाण्यात भा.दं.वि. कलम ३०८(२), १३७ (२), १४० (२), ३५२, ३५१, १८९(२), १९१ (२) शस्त्र प्रतिबंधक कायदा ३(२५) अन्वये गुन्हा दाखल करण्यात आला असून, पुढील तपास सहा. पोलिस निरीक्षक दीपक वाकचौरे करत आहेत. सर्व आरोपी फरार असून, पोलिस त्यांचा शोध घेत आहेत. दरम्यान, सत्ताधारी पक्ष असलेल्या शिवसेनेच्या (शिंदे गट) शहर युवासेना प्रमुखावर गुन्हा दाखल झाल्याने तालुक्यात खळबळ माजली असून, उलटसुलट चर्चेला उधाण आले आहे.