नालासोपाऱ्यात ८० लाखांच्या मेफेड्रॉनसह नायजेरियन नागरिकाला अटक
योगेश पांडे / वार्ताहर
वसई – तुळींज पोलिसांनी नालासोपारा येथून ८० लाखांच्या एमडी हे अमलीपदार्थ जप्त केले आहे. या प्रकारे एका मॅग्नेंट नागरिकाला अटक करण्यात आली आहे. नालासोपारा पूर्वेच्या ओमनगर येथील साईधाम मंदिर समोर अंमली पदार्थ विक्री करण्यासाठी एक नायजेरियन नागरिक येणार असल्याची बातमी तुळींज पोलीस ठाण्याच्या गुन्हे प्रकटीकरण शाखेला मिळाली होती. त्यानुसार तुळींज पोलीस ठाण्याच्या गुन्हे प्रकटीकरण शाखेने सापळा लावून संशयीत नायजेरीयन इसम नाम आयफियानी नवफॉर (३८) याला ताब्यात घेतले. त्याची झडती घेतली असता त्याच्याकडे ४०२ ग्रॅम वजनाचे एम. डी. (मेफेड्रॉन) नावाचे अमली पदार्थ आढळून आले. या मेफेड्रॉन अमली पदार्थांची किंमत २० हजार रुपये प्रती ग्रॅम आहे. या कारवाईत एकूण ८० लाख ४० हजार रुपयांचे अमली पदार्थ जप्त करण्यात आले आहे.
आरोपी विरोधात तुळींज पोलीस ठाण्यात एन.डी.पी.एस. कायदा १९८५ चे गुंगीकारक औषधीद्रव्य आणि मनोवैद्यानिक परिणाम करणारे पदार्थ अधिनियम १९८५ चे कलम ८ क २१ (क) प्रमाणे गुन्हा दाखल करण्यात आला आहे. सदर प्रकरणाचा पुढील तपास सहाय्यक पोलीस निरीक्षक सुनिल पवार करत आहेत. ही कामगिरी तुळींज पोलीस ठाण्याचे वरीष्ठ पोलीस निरीक्षक विजय जाधव, पोलीस निरक्षक बनकर, पोलिस निरीक्षक पेडणेकर, सपोनि सुनिल पवार, सुटनासे पोलीस हवालदार. केंद्रे, छपरीबन,मोरे, वरठा, राहुल कदम, पोटे, शिंदे, पालवे आदींच्या पथकाने केली आहे.