अनधिकृत बांधकामांवर कारवाई करणाऱ्या केडीएमसीच्या पथकावर शिवसेना पदाधिकाऱ्याचा रिव्हॉल्वरचा धाक दाखवत हल्ला
पोलीस महानगर नेटवर्क
कल्याण – कल्याण डोंबिवली महानगरपालिकेच्या पथकावर हल्ला करण्यात आला आहे. अनधिकृत बांधकामावर कारवाई करण्यासाठी गेलेल्या केडीएमसीच्या पथकावर शिवसेनेच्या माजी नगरसेवकाने हल्ला केल्याचा आरोप होत आहे. रिव्हॉल्वरचा धाक दाखवत अधिकारी कर्मचाऱ्यांना मारहाण करत गाड्यांची तोडफोड करण्यात आली आहे. कल्याणजवळील वडवली येथे हा धक्कादायक प्रकार घडला आहे. शिवसेना शिंदे गटाचे माजी नगरसेवक दुर्योधन पाटील, त्यांचा मुलगा वैभव पाटील आणि त्यांच्या साथीदारांनी हा हल्ला केल्याचा आरोप करण्यात येत आहे. केडीएमसीच्या अ प्रभाग क्षेत्र पथक प्रमुख राजेंद्र साळुंखे यांच्या नेतृत्वाखालील टीम वडवली परिसरातील निर्मल स्टाईल भागात कारवाईसाठी गेली. सहाय्यक आयुक्त प्रमोद पाटील यांच्या आदेशानंतर अनधिकृत चाळीची पाहणी करण्यास पथक घटनास्थळी पोहोचताच त्या ठिकाणी त्यांच्यावर हल्ला झाला. शिवसेना शिंदे गटाचे माजी नगरसेवक दुर्योधन पाटील आणि त्यांचा मुलगा वैभव पाटील त्यांच्या साथीदारसह घटनास्थळी आले. त्यांनी या पथकाला थेट शिवीगाळ करत मारहाण करण्यास सुरुवात केली. वैभव पाटील याने रिव्हॉल्वर काढून अधिकारी व कर्मचाऱ्यांना धमकी दिली. एका कर्मचाऱ्याला कानाखाली मारले, तर दुसऱ्याला काठीने मारहाण केली.
यावेळी केडीएमसीच्या वाहनांची तोडफोड देखील शिवसेनेच्या या लोकांनी केली. “येथे आमची गुन्हेगारी चालते, केडीएमसीच्या अधिकाऱ्यांनी इकडे फिरकायचे नाही,” “तुम्ही पुन्हा आलात तर गोळ्या घालू” अशी धमकी दिल्याचा आरोप अधिकाऱ्यांनी केला. याप्रकरणी कल्याणच्या खडकपाडा पोलीस ठाण्यात गुन्हा दाखल करण्यात आला असून पोलीस तपास करीत आहेत.