१३ वर्षांपासून फरार असलेल्या आरोपीला अटकः अँटॉप हिल पोलिसांची यशस्वी कामगिरी
मुंबई – अँटॉप हिल पोलिसांनी मोठ्या शिताफीने २०१२ पासून फरार असलेल्या एका गंभीर गुन्ह्यातील आरोपीला अटक केली आहे. पोलिसांनी गुप्त माहितीच्या आधारे सायन कोळीवाडा येथे सापळा रचून ही कामगिरी केली. याबाबत गुन्हा क्रमांक ९६/२०१२ अन्वये आरोपी कुप्पन मारीअप्पन देवेंद्र (वय ३६) याच्यावर भारतीय दंड संहिता कलम ३०७ (खूनाचा प्रयत्न), ४५२ (बळजबरीने घरात घुसणे), ३२४, ३२३ (जखमी करणे), तसेच १४३, १४४, १४६, १४७, १४८, १४९ (बेकायदेशीर जमाव) आणि शस्त्र कायदा ४, २५ तसेच महाराष्ट्र पोलीस कायदा ३७(१) सह १३५ अंतर्गत गुन्हा नोंदवण्यात आला होता.
सदर आरोपी गेल्या अनेक वर्षांपासून फरार होता. त्याच्यावर स्थायी वॉरंटही जारी करण्यात आले होते. अपर पोलीस आयुक्त अनिल पारसकर व अतिरिक्त सत्र न्यायालय क्र. ३० यांनी अँटॉप हिल पोलिसांना याबाबत सूचना दिल्या होत्या. त्यानुसार, पोलिस उपायुक्त रागसुधा आर., सहाय्यक पोलिस आयुक्त शैलेंद्र धिवार, तसेच वरिष्ठ पोलीस निरीक्षक सुधाकर ढाणे यांच्या मार्गदर्शनाखाली विशेष पथक तयार करण्यात आले. तडीपार अधिकारी पो. उपनिरीक्षक अरफात सिध्दीकी यांच्या नेतृत्वाखाली पो. हवालदार गोरख सानप, पो. हवालदार शिवाजी दहिफळे, आणि महिला पोलीस अंमलदार काजल सपकाळ यांनी तपास सुरू केला.
प्रथम आरोपीच्या आई व बहिणीकडे चौकशी करण्यात आली. मात्र, त्यांच्याकडून कोणतीही महत्त्वाची माहिती मिळाली नाही. त्यामुळे पोलिसांनी परिसरात गुप्तपणे शोधमोहीम सुरू केली. त्याच दरम्यान, आरोपी एका एस.आर.ए. प्रकल्पाच्या सर्व्हेक्षणासाठी येणार असल्याची माहिती मिळाली.
२० फेब्रुवारी २०२५ रोजी सकाळी १२ वाजता पोलिस पथकाने सायन कोळीवाडा येथे सापळा रचला. तेथे सर्व्हे करणाऱ्या अधिकाऱ्यांमध्ये मिसळून पोलिसांनी बारकाईने निरीक्षण सुरू केले. आरोपीने सर्व्हेक्षणासाठी आधारकार्ड सादर करताच त्याची खातरजमा करण्यात आली.
तोच हा फरार आरोपी असल्याचे निश्चित होताच पोलिसांनी त्याला ताब्यात घेतले. त्याला स्थायी वॉरंटनुसार अटक करून न्यायालयात हजर करण्यात आले. मा. सत्र न्यायालयाने आरोपीस ६ मार्च २०२५ पर्यंत न्यायालयीन कोठडी सुनावली आहे. ही कारवाई पोलीस उपायुक्त रागसुधा आर., सहाय्यक पोलीस आयुक्त शैलेंद्र धिवार, वरिष्ठ पोलीस निरीक्षक सुधाकर ढाणे, गुन्हे शाखेचे पोलीस निरीक्षक समीर कांबळे, तसेच कावसुमधील सपोनि सतिश काबळे यांच्या मार्गदर्शनाखाली पार पाडण्यात आली. या कामगिरीत पो. उपनिरीक्षक अरफात सिध्दीकी, पो. हवालदार गोरख सानप, पो. हवालदार शिवाजी दहिफळे, तसेच महिला पोलीस अंमलदार काजल सपकाळ यांनी महत्त्वपूर्ण भूमिका बजावली. पोलिसांनी दाखवलेल्या सतर्कतेमुळे अखेर एक फरार आरोपी गजाआड झाला असून, यामुळे परिसरात कायदा व सुव्यवस्थेचा प्रश्न सुटण्यास मदत होईल.