नागपुरात भरदिवसा गोळीबार ; गोळीबारात एकाचा मृत्यू तर दोघेजण गंभीर जखमी
योगेश पांडे/वार्ताहर
नागपुर – नागपूर जिल्ह्यातील खापरखेडा येथे भरदिवसा गोळीबार झाल्याची घटना घडली आहे. ज्यामध्ये एकाचा मृत्यू झाला, तर दोघे गंभीर जखमी झाले आहेत. या घटनेची माहिती मिळताच गुन्हे शाखा आणि खापरखेडा पोलीस घटनास्थळी दाखल झाले. जखमींना उपचारासाठी रुग्णालयात दाखल करण्यात आलं आहे. पवन धीरज हिरणवार असे मृतकाचे नाव आहे. मृतक हा गुन्हेगारी प्रवृत्तीचा असून, त्याच्यावर पोलिसात खुनासह अनेक गुन्हे दाखल आहेत. जुन्या वैमनस्यातून ही हत्या झाल्याचे प्राथमिक तपासात समोर आले आहे. याप्रकरणी मिळालेल्या माहितीनुसार, पवन हा त्याच्या दोन मित्रांसह खापरखेडा येथील बाभूळखेडा येथून कारने जात होता. दरम्यान, मागून तीन दुचाकींवरुन पाच ते सहा जण आले आणि त्यांनी गोळीबार सुरू केला. या घटनेत पवनला गोळी लागली आणि पवनचा जागीच मृत्यू झाला. तर, या गोळीबारात त्याचे दोन मित्र गंभीर जखमी झाले आहेत. गोळीबाराचा आवाज ऐकताच आजूबाजूचे लोक घटनास्थळी जमा झाले. घटनेची माहिती मिळताच खापरखेडा पोलीस तात्काळ घटनास्थळी पोहोचले आणि जखमींना उपचारासाठी रुग्णालयात दाखल केले.
गुन्हा केल्यानंतर सर्व आरोपी घटनास्थळावरून फरार झाले. गोळीबाराचा आवाज ऐकताच जवळच्या शेतात काम करणारे लोक तात्काळ घटनास्थळी पोहोचले आणि पोलिसांना घटनेची माहिती दिली. या हत्येचे वृत्त समजताच खापरखेडा पोलीस आणि गुन्हे शाखेचे पथक घटनास्थळी पोहोचले. पोलिसांनी जखमींना तात्काळ उपचारासाठी रुग्णालयात दाखल केले. तर, पंचनामा करून मृतदेह शवविच्छेदनासाठी पाठवण्यात आला आहे. मृत हा देखील गुन्हेगार होता, त्याच्यावर खुनासह अनेक गुन्हे दाखल आहेत. त्यामुळे जुन्या वैमनस्यातून ही हत्या झाल्याचे प्राथमिक तपासात समोर आले आहे. सध्या पोलीस व गुन्हे शाखेचे पथक पुढील तपास करत आहेत.