चुकीचा उपचार व डॉक्टरांच्या हलगर्जीपणामुळे १६ वर्षीय मुलीचा मृत्यु, नातेवाईकांचा मृतदेह घेण्यास नकार
योगेश पांडे/वार्ताहर
ठाणे – कळव्यातील महात्मा फुले नगर येथे एक धक्कादायक घटना उघडकीस आली आहे. मृत कोमल शंकर राठोड (१६) या मुलीच्या छातीमध्ये गाठ आल्याने तिच्यावर कळव्यातील आयुष्यमान रुग्णालयात उपचार सुरू होते. डॉक्टर श्याम पांडे यांच्या सल्ल्यानुसार मंगळवार १ ऑक्टोबरला तिला रुग्णालयात दाखल करण्यात आले आणि तिच्यावर बुधवार २ ऑक्टोबरला ऑपरेशन करण्यात आले. ऑपरेशन यशस्वी झाल्याचे तिच्या नातेवाईकांना सांगण्यात आले. मात्र ऑपरेशननंतर दुसऱ्या दिवशीच तिला इन्स्पेक्शन झाल्याने तिला प्रचंड ताप आल्याने तिचे सर्व अंग सुजले आणि त्यानंतर तीन दिवसांनी आमच्याकडे हे इन्स्पेक्शन दूर करण्यासाठी मशीन नसल्याने तिला कळव्यातील छत्रपती शिवाजी महाराज रुग्णालयात उपचारासाठी नेण्याचा सल्ला दिला. परंतु कळवा रुग्णालयात नेल्यावर तिची प्रकृती अधिक गंभीर होऊन सोमवारी तिचा मृत्यू झाला. मृत कोमलचा मृत्यू डॉक्टर श्याम पांडे यांनी चुकीचे उपचार करून आणि हलगर्जीपणामुळे झाल्याचा आरोप तिच्या नातेवाईकांनी करून कळवा पोलिसांनी या डॉक्टरला अटक केल्याशिवाय मृतदेह ताब्यात न घेण्याचा पवित्रा घेतला आहे.
मुलीचा मृत्यू झाल्याची घटना समजताच महात्मा फुले नगरमधील तिच्या नातेवाईकांनी आणि येथील नागरिकांनी सोमवारी सायंकाळी कळवा पोलीस ठाण्याबाहेर एकच गर्दी केली होती. तिच्या नातेवाईकांनी कळवा पोलिसांकडे डॉक्टरवर गुन्हा दाखल करण्याची मागणी केली आहे. मृत कोमल ठाणे महापालिका शाळेतील महात्मा फुले नगर येथील ठाणे महापालिका शाळेत इयत्ता नववीमध्ये शिकत होती स्वभावाने अत्यंत शांत आणि अभ्यासाने हुशार असल्याची माहिती तिच्या नातेवाईकांनी दिली. तिचा मृत्यू झाल्याचे समजताच महात्मा फुले नगर परिसरात शोककळा पसरली आहे. या संदर्भात कळवा पोलिसांशी संपर्क साधला असता त्यांनी सांगितले की, ‘नातेवाईकांना मृतदेह ताब्यात घेण्यासंदर्भात समजावले आहे. शवविच्छेदन अहवालातून डॉक्टरने चुकीचे उपचार केल्याचा अहवाल आला तरच गुन्हा दाखल करता येईल’, असं कळवा पोलीस ठाण्याचे वरिष्ठ पोलीस निरीक्षक अशोक उतेकर यांनी सांगितलं.