प्रेयसीसोबत झालेल्या वादातून गोरेगाव मेट्रो स्थानकावरुन उडी घेत तरुणाने केली आत्महत्या
योगेश पांडे/वार्ताहर
मुंबई – गोरेगाव मेट्रो स्थानकावरुन एका तरुणाने उडी घेत आपल्या आयुष्याची अखेर केली. ही धक्कादायक घटना गोरेगाव वेस्ट मेट्रो स्थानकात सोमवारी संध्याकाळच्या सुमारास घडली.मिळालेल्या माहितीनुसार, सिद्धांत असं आत्महत्या केलेल्या तरुणाचं नाव आहे. सध्या या प्रकरणी बांगूर नगर पोलिसांनी अपमृत्यूची नोंद केली आहे. मेट्रो स्थानकातून आत्महत्या केल्याची ही पहिलीच घटना असल्याचं सांगितलं जात आहे. मुंबईच्या गोरेगाव वेस्ट मेट्रो स्टेशनच्या प्लॅटफॉर्म नंबर एकवरुन खाली उडी घेत सिंद्धांतने आत्महत्या केली. प्रेयसीसोबत झालेल्या वादातून त्याने हे टोकाचं पाऊल उचलल्याचं सांगितलं जात आहे. प्रत्यक्षदर्शींनी दिलेल्या माहितीनुसार, संध्याकाळच्या सुमारास सिद्धांत हा त्याच्या प्रेयसीसोबत प्लॅटफॉर्म नंबर एकवर उभा होता. यादरम्यान त्याचा प्रेयसीसोबत कुठल्या कारणावरुन वाद झाला. यानंतर सिद्धांतने थेट मेट्रो स्थानकावरुन खाली उडी घेतली. यामध्ये त्याचा जागीच मृत्यू झाला. या घटनेनंतर त्याच्या प्रेयसीला मेट्रोच्या कर्मचाऱ्यांनी थांबवून ठेवलं.
ही घटना घडली तेव्हा मेट्रो स्थानकात उपस्थित कर्मचारी हा फोनवर बोलण्यात व्यस्त असल्याचंही प्रत्यक्षदर्शींनी सांगितलं आहे. जर, त्यांनी वेळीच सिद्धांतला थांबवलं असतं तर कदाचित ही दुर्दैवी घटना टळू शकली असती, असंही बोललं जात आहे. पोलिसांनी दिलेल्या माहितीनुसार, एमएमआरडीएच्या वतीने गुंदवली ते दहिसर ही मेट्रो सेवा सुरू करण्यात आली असून गोरेगाव पश्चिम येथे मेट्रोचे स्थानक आहे. गोरेगावच्या भगत सिंग नगर येथे सिध्दांत हा आई वडिलांसोबत राहत होता. संध्याकाळी सिध्दांत गोरेगाव पश्चिम मेट्रो स्थानकात आला. त्याने मेट्रोचे तिकीट खरेदी केले. तिकीट खरेदी केल्यानंतर तो फलाटावर गेला. रुळापासून दूर असलेल्या ग्रीलजवळ तो गेला. मग त्याने ग्रीलवरुन खाली उडी मारली आणि तो रस्त्यावर पडला. त्यातच त्याचा मृत्यू झाला. सध्या त्याच्या आत्महत्येचं कारण समजू शकलं नाही. मात्र, सिध्दांत काही दिवसांपासून तणावाखाली होता, असे पोलिसांनी म्हटले आहे. पोलीस सध्या या प्रकरणाचा तपास करत आहेत.