संतापजनक ! बँकेतील महिला अधिकार्‍यावर लैंगिक अत्याचार करणाऱ्या सहकाऱ्याला अटक, पनवेलमधील संतापजनक घटना
पोलीस महानगर नेटवर्क
पनवेल – राज्यात दिवसेंदिवस मुली व महिलांवरील अत्याचारामध्ये वाढ होत आहे. अशीच एक घटना पनवेल परिसरात घडली आहे. पनवेलमधील बँकेत कामाला असलेल्या २९ वर्षीय कर्मचार्‍याने बँकेतील ४१ वर्षीय महिला अधिकार्‍यावर लैंगिक अत्याचार केल्याची घटना उघडकीस आली आहे. पनवेल शहर पोलिसांनी सदर कर्मचार्‍याविरुध्द बलात्काराचा गुन्हा दाखल करुन त्याला अटक केली आहे. या प्रकरणातील ४१ वर्षीय पिडीत महिला पनवेल मधील बँकेत अधिकारी म्हणून कार्यरत आहे. तर तिच्यावर लैंगिक अत्याचार करणारा आरोपी देखील त्याच बँकेमध्ये चालक म्हणून कामाला आहे. काही महिन्यापूर्वी आरोपी कर्मचाऱ्याने या महिलेसोबत मैत्री करुन तिच्यासोबत शरीरसंबंध प्रस्थापित केले होते. त्यावेळी आरोपीने पिडीत महिलेसोबतचे व्हिडीओ आणि फोटो काढले होते. त्यानंतर त्याने पीडित महिलेचे त्याच्यासोबत असलेले व्हिडीओ आणि फोटो तिच्या घरच्यांना तसेच बँकेतील इतर कर्मचाऱ्याना दाखविण्याची धमकी देऊन तिच्यावर बँकेच्या दुसऱ्या मजल्यावरील स्टोअररुमध्ये तसेच पनवेल मधील त्याच्या घरी नेऊन अनेकवेळा जबरदस्तीने लैंगिक अत्याचार केले. दिवसेंदिवस सदर प्रकार असह्य झाल्याने पिडीत महिलेने त्याला विरोध करण्यास सुरुवात केली असता, त्याने तिला शिवीगाळ आणि मारहाण करण्यास सुरुवात केली. अखेर या महिलेने पनवेल शहर पोलीस ठाणे गाठून तक्रार दाखल केला असून पोलीस पुढील तपास करीत आहेत.