मित्राच्या प्रेयसीची छेड काढली म्हणून आठ जणांनी केली २९ वर्षीय युवकाची हत्या; सहा आरोपींना अटक
योगेश पांडे / वार्ताहर
वाशीम – मित्राच्या प्रेयसीची छेड काढत असल्याच्या रागाने आठ जणांच्या टोळक्याने एकाला धारदार शस्त्राने भोसकून खून केल्याची घटना घडली आहे. ही घटना गुरुवार दुपारी ४ वाजताच्या सुमारास वाशिम शहर पोलीस स्टेशनच्या पाठीमागे हॉटेल व्यंकटेशजवळ घडली आहे. यामध्ये राहुल वाघ या २९ वर्षीय युवकाचा जागीच मृत्यू झाला आहे. या प्रकरणी सहा आरोपींना अटक करण्यात आली आहे. पोलीस सूत्रांनी दिलेल्या माहितीनुसार, मृतक राहुल वाघ हा वाशिम तालुक्यातील काटा येथील रहिवासी असून वाशिम शहरातील एका खासगी दवाखान्यात काम करायचा. त्याच्या परिचित एका मुलीचे भागवत विक्रम धोंगडे या २३ वर्षीय मुलाशी प्रेमसंबंध होते. मृतक राहुलने एकदा या प्रेमी जोडप्याला सोबत पाहिल्याने ”तुझ्या घरी सांगतो”, अशी मुलीला धमकी दिली. त्यामुळे प्रेम प्रकरणाचे बिंग फुटेल या भीतीने प्रेयसी मुलीने सदर बाब आपल्या प्रियकराला सांगितली.
घरी सांगण्याची धमकी दिल्याने प्रियकर भागवत धोंगडे याने आपल्या सात मित्रांसह मृतक राहुल वाघ याला शहर पोलीस स्टेशनच्या मागे असलेल्या हॉटेल व्यंकटेशजवळ बोलावलं. तिथे या तरुणाला बेदम मारहाण करून या टोळक्यातील वैभव उर्फ खंजर नागोराव गुंजकर या २१ वर्षीय तरुणाने राहुलवर धारधार शस्त्राने सपासप वार केले. त्यानंतर सर्वांनी तेथून पळ काढला. मात्र यामध्ये राहुल गंभीर जखमी होऊन रक्ताच्या थारोळ्यात पडला आणि त्याचा जागीच मृत्यू झाला. या प्रकरणी पोलिसांनी तपासाची चक्रे फिरवत यातील सहा आरोपींना अटक केली आहे. यामध्ये आरोपी प्रियकर भागवत विक्रम धोंगडे, वीरेंद्र संतोष खडसे, सागर संतोष मापारी, वैभव उर्फ खंजर नागोराव गुंजकर, अभिषेक किसन इरतकर, गौरव विनोद गवळी या आरोपींना अटक केली असून विश्र्वेश लेनगुते आणि सचिन कोठेकर हे दोन आरोपी फरार आहेत. त्यांच्या शोधार्थ पोलिसांचे दोन पथके रवाना झाले आहेत. या आरोपींवर कलम ५०३/२०२४, १०३(१), १८९(२), १८९(४), १९०, १९१(२)(३) भारतीय न्याय संहितेनुसार खुनाचा गुन्हा दाखल करण्यात आला आहे. वाशीम शहरात भरदिवसा झालेल्या गॅंगवॉरमुळे शहरात दहशतीचे वातावरण निर्माण झाले असून पोलिसांचा धाक राहिल नाही का? असा प्रश्न निर्माण झाला आहे.