माजी पोलीस महासंचालक संजय पांडे यांच्यासह सात जणांवर खंडणीचा गुन्हा दाखल
पोलीस महानगर नेटवर्क
ठाणे– महाराष्ट्राचे माजी पोलिस महासंचालक संजय पांडे यांच्यासह अन्य सहा जणांविरुद्ध जबरदस्ती आणि बेकायदेशीर कृत्यांच्या आरोपांवरून ठाणे नगर पोलीस ठाण्यात गुन्हा दाखल झाला आहे. काल मुंबईतील व्यवसायिक संजय पुनामिया यांच्या तक्रारीवरून संजय पांडे आणि त्यांच्या सहकाऱ्यां विरुद्ध गुन्हा दाखल करण्यात आला आहे. ठाण्याचे पोलिस आयुक्त आशुतोष डुंबरे यांनीही असा गुन्हा दाखल झाल्याच्या बातमीस दुजोरा दिला आहे. या प्रकरणामध्ये आणखी धक्कादायक खुलासे होण्याची शक्यता आहे. महाराष्ट्राचे माजी पोलीस महासंचालक संजय पांडे आणि त्यांच्या सहकाऱ्यांविरुद्ध ठाण्यात खंडणीचा गुन्हा दाखल करण्यात आला आहे. माजी पोलीस महासंचालक संजय पांडे यांच्यासह ठाण्यातील अधिवक्ता शेखर जगताप, निवृत्त सहायक पोलिस आयुक्त सरदार पटेल, पोलीस निरीक्षक मनोहर पाटील, श्यामसुंदर अग्रवाल, शुभम अग्रवाल आणि शरद अग्रवाल यांच्यावर गुन्हा दाखल करण्यात आला आहे.
तक्रारदार पुनामिया यांनी म्हणाले ,मे २०२१ ते ३० जून २०२४ या कालावधीत गुन्हा दाखल झालेल्या आरोपींनी आपल्याला त्रास दिला आहे. तसेच आरोपींनी ठाणे नगर पोलिसांमध्ये २०१६ मध्ये दाखल झालेल्या एका गुन्ह्याचा बेकायदेशीर तपास केला. मला आणि इतर व्यावसायिकांना खोट्या केसेसच्या धमक्या दिल्या, पैसे उकळले आणि विशेष सरकारी वकील म्हणून खोटे दस्तऐवज तयार करून न्यायालयाची दिशाभूल करण्याचा प्रयत्न केला. भारतीय दंड संहितेच्या १६६(अ) १७०, १२० ब, १९३, १९५, १९९, २०३, २०५ आणि २०९, ३५२ व ३५५, ३८४, ३८९, ४६५, ४६६, ४७१ या कलमांखाली सर्व आरोपींवर गुन्हा दाखल करण्यात आला आहे. ठाणेनगर पोलीस ठाण्यात २६ ऑगस्ट २०२४ रोजी ईमेलद्वारे पुनामिया यांनी ही तक्रार दाखल केली आहे. या संपूर्ण प्रकरणाची चौकशी करण्यात येत असल्याची माहिती एका वरिष्ठ पोलिस अधिकाऱ्याने दिली.
मी काहीही चुकीचे केलेले नाही – संजय पांडे
संजय पांडे यांनी दाखल एफआयआर आणि आरोपांना उत्तर देताना प्रसारमाध्यमांसी बोलताना सांगितले की, मला आत्ताच तक्रारीची माहिती मिळाली आहे. मी काहीही चुकीचे केलेले नाही. मी अद्याप एफआयआर पाहिलेला नाही. ठाणे गुन्हे शाखा सध्या या आरोपांचा तपास करत असून अद्याप कोणालाही अटक झालेली नाही.