पुण्यात मराठीच्या आग्रहासाठी मेडिकल दुकानदाराला मनसेकडून चोप, ६ ते ७ कार्यकर्त्यांवर गुन्हा दाखल
पोलीस महानगर नेटवर्क
पुणे – राज्यात नेहमीच मराठीसाठी लढणाऱ्या महाराष्ट्र नवनिर्माण सेनेच्या कार्यकर्त्यांनी एका मेडिकल दुकानदारला चोपले आहे. मराठी यायलाच पाहिजे, असे म्हणून विश्रांतवाडी येथील एका मेडिकल दुकानदाराला मारहाण करीत त्याचा व्हिडिओ व्हायरल केल्याप्रकरणी महाराष्ट्र नवनिर्माण सेनेच्या (मनसे) ६ ते ७ कार्यकर्त्यांवर विश्रांतवाडी पोलीस ठाण्यात गुन्हा दाखल केला आहे. धानोरी येथे हा प्रकार घडला. त्याचा व्हिडिओ सोशल मीडियावर चांगलाच व्हायरल झाला आहे. गणेश पाटील (४०) व त्याचे इतर ५ ते ६ साथीदार यांच्यावर गुन्हा दाखल झाला आहे. याबाबत यश गोकुळ छल्लानी (२५, रा. धानोरी) यांनी फिर्याद दिली आहे. गुरुवारी (दि. १८) सायंकाळी धानोरीतील एका मेडिकलमध्ये ही घटना घडली
याबाबत अधिक माहिती अशी की, तक्रारदार यश हे मेडिकलमध्ये असताना मनसेचे गणेश पाटील त्यांचे साथीदार तेथे आले. त्यांनी तक्रारदार यांना शिवीगाळ करून हाताने मारहाण केली. महाराष्ट्रात राहतोस तुला मराठी यायलाच पाहिजे, असे बोलून त्यांना दुकानाच्या बाहेर ओढले. त्यांच्या अंगावर शाई टाकून झाल्या प्रकरणाबाबत माफी मागण्यास लावले. याचा व्हिडिओ बनवून तो सोशल मीडियावर व्हायरल करून फिर्यादी यांची बदनामी केल्याचे तक्रारीत म्हंटले आहे. वरिष्ठ पोलीस निरीक्षक कांचन जाधव यांच्या मार्गदर्शाखाली पुढील तपास करण्यात येत आहे.