पुण्यात राज्य उत्पादन शुल्क विभागाची धडक कारवाई; ३२ पब, रूफटॉप रडारवर
पोलीस महानगर न्यूज नेटवर्क
पुणे – कल्याणीनगर येथील अपघाताच्या पार्श्वभूमीवर राज्य उत्पादन शुल्क पुणे विभागाकडून मागील तीन दिवसांपासून १४ पथकांमार्फत राबविण्यात आलेल्या धडक कारवाईत ३२ विविध परवाना कक्ष अनुज्ञाप्तीवर गुन्हे दाखल करण्यात आलेले आहेत.
जिल्हाधिकाऱ्यांच्या आदेशानुसार या अनुज्ञाप्तींचे व्यवहार तात्काळ बंद ठेवण्यात आले असून सर्व अनुज्ञाप्ती सील करण्यात आलेल्या आहेत. सदर कारवाईत १० रूफटॉप हॉटेल, अंदाजे १६ पब, इतर ६ परवाना कक्ष बार अशा एकूण ३२ अनुज्ञाप्तींचे व्यवहार तात्काळ बंद ठेवण्याचे आदेश पारित करण्यात आलेले असून सर्व अनुज्ञाप्ती सील करण्यात आलेल्या आहेत. जिल्हाधिकारी, राज्य उत्पादन शुल्क विभागाचे आयुक्त, उपआयुक्त यांच्या मार्गदर्शनाखाली पुणे जिल्ह्यात धडक मोहिम राबविण्यात येत आहे. राज्य उत्पादन शुल्क विभागांकडून वारंवार अनुज्ञाप्तींच्या गैरव्यवहाराबाबत कारवाई करण्यात येते. कोझी बारवर आता अनुज्ञाप्तीचे व्यवहार बंद केल्याची कारवाई केलेली असली तरी दोन महिन्यापूर्वीही राज्य उत्पादन शुल्क विभागाने विभागीय गुन्हा नोंद केलेला आहे.
सन २०२३-२४ मध्ये राज्य उत्पादन शुल्क पुणे विभागाकडून एकूण २९७ अनुज्ञाप्तीवर विविध कारणांसाठी गुन्हे नोंद करण्यात आलेले आहेत. त्यामध्ये १ कोटी १२ लाख रुपये इतका दंड वसूल करण्यात आलेला आहे. १७ अनुज्ञाप्तींवर निलंबनाची कारवाईदेखील करण्यात आलेली असून २ अनुज्ञत्या कायमस्वरुपी बंद करण्यात आल्या आहेत. एप्रिल २०२४ पासून ५४ अनुज्ञाप्त्यांवर गुन्हे नोंद करण्यात आलेले असून ५ लाख रुपये इतका दंड वसुल केलेला आहे. यात एकूण ३२ अनुज्ञाप्त्या सील करण्यात आलेल्या आहेत. राज्य उत्पादन शुल्क विभाग नियोजनबद्ध कारवाई करीत असून अनुजज्ञाप्ती विहीत वेळेनंतर सुरू ठेवणे, अल्पवयीन मुलांना मद्यविक्री करणे, अवैध ठिकाणांवर (रुफटॉपवर) मद्यविक्री करणे या बाबत सर्व पथकांकडून तपासणी मोहिम सुरू आहे.