पिंपरी चिंचवडमध्ये मानलेल्या बहिणीवर अत्याचार केल्याने डोक्यात विट घालून खून
पोलीस महानगर नेटवर्क
पिंपरी – मानलेली बहिण नशेत असताना तिच्यासोबत लैंगिक अत्याचार केले. याचा राग आल्याने भावाने वीट डोक्यात घालून तरुणाचा खून केला. ही घटना भूमकर वस्ती, वाकड येथील भामा पर्ल सोसायटीत घडली आहे. याबाबत शवविच्छेदन अहवाल आल्यानंतर बुधवारी (दि.१०) खुनाचा गुन्हा दाखल करण्यात आला आहे.
निकेतकुणाल विजयकुमार सिंह (वय २८, रा. भुजबळवस्ती, वाकड) असे खून झालेल्या तरुणाचे नाव आहे. तर लोकेंद्र किशोरसिंह (वय २८, रा. दत्त मंदिर रोड, वाकड, मूळ रा. राजस्थान) याच्या विरोधात खुनाचा गुन्हा दाखल करण्यात आला आहे. याप्रकरणी पोलीस उपनिरीक्षक ज्ञानेश्वर अंकुशराव झोल यांनी बुधवारी (दि. १०) हिंजवडी पोलीस ठाण्यात फिर्याद दिली आहे.
याबाबत पोलिसांनी दिलेल्या माहितीनुसार, संशयित लोकेंद्र यांची मानलेली बहीण आणि निकेतकुणाल सिंह हे एकाच कंपनीत नोकरीला होते. दरम्यान, ३ एप्रिल रोजी रात्री त्यांच्या कंपनीतील सहकारी पार्टीसाठी एकत्र आले. लोकेंद्रच्या बहिणीला नशा जास्त झाल्याने ती निकेतकुणाल याच्या फ्लॅटवर थांबली. त्यावेळी निकेतकुणाल याने तिच्यावर लैंगिक अत्याचार केले. याबाबत तिने तिचा मानलेला भाऊ लोकेंद्र याला माहिती दिली. याबाबत जाब विचारण्यासाठी लोकेंद्र वीट घेऊन निकेतकुणाल याला मारण्यासाठी त्याच्या फ्लॅटवर गेला. तेथे दोघांमध्ये वाद झाला. त्यावेळी लोकेंद्र याने निकेतकुणाल याच्या डोक्यात वीट घातली. यामध्ये जखमी झालेल्या निकेतकुणाल याला रुग्णालयात दाखल केले. उपचार केल्यानंतर त्याला घरी सोडण्यात आले, दरम्यान, रात्री झोपेत त्याचा मृत्यू झाला. हिंजवडी पोलीस तपास करत आहेत.
या घटनेनंतर आपल्यावर बलात्काराचा गुन्हा दाखल होईल व आपली बदनामी होईल, अशी भिती निकेतकुणालच्या मनात निर्माण झाली. त्यामुळे रुग्णालयातून घरी आल्यानंतर निकेतकुणाल याने गळफास घेऊन आत्महत्या करण्याचा प्रयत्न केला. त्याच्या गळ्याभोवती व्रण देखील दिसत होते. त्यानुसार, पोलिसांनी आत्महत्या केल्याची नोंद घेतली. दरम्यान, शवविच्छेदन अहवालात निकेतकुणाल याच्या डोक्याला मार लागल्याने मृत्यू झाल्याचे कारण समोर आले. त्यानुसार, पोलिसांनी सखोल चौकशी केली असता खुनाचा प्रकार उघडकीस आला.