डोंबिवलीतील किराणामध्ये विमल पान मसल्याची विक्री करणाऱ्या दुकानात धाड; ६९ हजाराचा साठा जप्त
विष्णुनगर पोलीस ठाण्याचे हवालदार शिरीष शिर्के यांच्या तक्रारीवरून दुकानदारा मनोज गुप्ता यांच्या विरुध्द गुन्हा दाखल
योगेश पांडे
डोंबिवली – गुटखा विक्रीस कायद्याने बंदी असताना देखील कल्याण डोंबिवलीत सर्रास अंमली पदार्थांची विक्री केली जात आहे. डोंबिवली पश्चिमेतील देवी चौकातील एका किरणा दुकानदाराने आपल्या दुकानात विमल पान मसाल्याचा साठा करून त्याची विक्री केल्याचे आढळून आले आहे. याप्रकरणी विष्णुनगर पोलिसांनी संबंधित दुकानदार मनोज गुप्ता (वय ३५) विरुध्द अन्न आणि सुरक्षा कायद्याने गुन्हा दाखल केला आहे. दुकानदाराकडून ६९ हजाराचा पान मसल्याचा साठा जप्त करण्यात आला आहे. डोंबिवली पश्चिमेतील देवी चौकातील राम मंदिराजवळ लक्ष्मी सोहम इमारतीत मनोज याचे किराणा दुकान आहे. मनोज हा दुकानात विमल पान मसाला विकत असल्याची माहिती मिळताच पोलिसांना पोलिसांनी या दुकानावर पाळत ठेवली होती.
विष्णुनगर पोलिसांनी अचानक गुप्ता याच्या दुकानात छापा टाकला. त्यावेळी त्यांच्या दुकानात विक्रीसाठी प्रतिबंधित विमल पान मसाल्याचा ६९ हजार रूपये किमतीचा साठा आढळून आला. गुप्ता हा मसाला ग्राहकांना किरकोळ पध्दतीने विकत असल्याचे आढळले. मानवी आरोग्यास घातक असा पान मसाला विक्री करून नागरिकांच्या जीवाला धोका निर्माण करण्याचा प्रयत्न केल्या बद्दल साहाय्यक पोलीस आयुक्त सुनील कुराडे यांच्या आदेशावरून वरिष्ठ पोलीस निरीक्षक मोहन खंदारे यांच्या पथकाने गुप्ता यांच्या दुकानावर छापा टाकला. विमल पान मसाल्याचा साठा जप्त केला. विष्णुनगर पोलीस ठाण्याचे हवालदार शिरीष शिर्के यांच्या तक्रारीवरून दुकानदारा मनोज गुप्ता यांच्या विरुध्द गुन्हा दाखल करण्यात आला आहे. गेल्या सहा महिन्यात अशाप्रकारे डोंबिवलीतील पाच ते सहा पान टपरी चालकांविरुध्द गुन्हा दाखल करण्यात आला आहे.