मुंबई कोस्टल रोड टनेलमध्ये कारला अचानक आग; मोठी वाहतूक कोंडी, जीवितहानी टळली
मुंबई : मुंबईतील कोस्टल रोड टनेलमध्ये गुरुवारी (२५ सप्टेंबर) सकाळी एका कारला अचानक आग लागल्याने मोठी वाहतूक कोंडी झाली. सकाळी सुमारे ९.३० वाजता दक्षिणेकडील (साऊथबाउंड) टनेलमध्ये ही घटना घडली.
मुंबई ट्रॅफिक पोलिसांनी तातडीने उत्तर मुंबईहून दक्षिण मुंबईकडे जाणारी वाहतूक थांबवली. सोशल मीडियावर व्हायरल झालेल्या व्हिडिओमध्ये पांढऱ्या कारमधून आगीच्या ज्वाळा उसळताना आणि धूर संपूर्ण टनेलमध्ये पसरताना दिसतो. हे दृश्य पाहून प्रवाशांमध्ये घबराट पसरली.
घटनेनंतर वाहतूक हाजी अली आणि वरळी कनेक्टरकडे वळवण्यात आली. जवळपास अर्धा तास वाहतूक ठप्प राहिली. नंतर परिस्थिती नियंत्रणात आल्यानंतर वाहनांची हालचाल सुरळीत करण्यात आली.
सुदैवाने या घटनेत कोणतीही जीवितहानी झालेली नाही. मात्र कारला लागलेल्या आगीमुळे प्रवाशांना मोठ्या अडचणींचा सामना करावा लागला.