भरधाव मोटारगाडीचा अपघात; घाटकोपरमध्ये पदपथावर झोपलेल्या तिघांना गंभीर दुखापत
पोलीस महानगर नेटवर्क
मुंबई : घाटकोपरमधील एल.बी.एस. मार्गावर शनिवारी सकाळी झालेल्या अपघातात पदपथावर झोपलेल्या तिघांना गंभीर दुखापत झाली. सकाळी सुमारे ७ वाजताच्या सुमारास महापालिकेच्या पाणीपुरवठा विभागाच्या कार्यालयाजवळ ही घटना घडली.
भरधाव वेगात आलेली एक मोटारगाडी अचानक नियंत्रण सुटल्याने दुभाजकावर आदळून थेट रस्त्याच्या कडेला असलेल्या दुकानांच्या पायऱ्यांवर घसरली. याच वेळी पदपथावर झोपलेल्या तिघांना गाडीची जोरदार धडक बसली. अपघातानंतर परिसरातील नागरिकांनी तत्काळ पोलिसांना माहिती दिली. घाटकोपर पोलिस घटनास्थळी दाखल होऊन जखमींना त्वरीत राजावाडी रुग्णालयात दाखल करण्यात आले. तिघांवर सध्या अतिदक्षता विभागात उपचार सुरू आहेत.
प्रत्येक्षदर्शींच्या माहितीनुसार अपघातग्रस्त मोटारगाडीत दोन तरुणी आणि एक तरुण होता. अपघाताच्या वेळी तिघेही मद्यधुंद अवस्थेत असल्याचा संशय स्थानिकांनी व्यक्त केला आहे. पोलिसांनी अपघातात सामील तिघांना ताब्यात घेतले असून त्यांच्याविरोधात पुढील तपास सुरू आहे.