हुंडाबळी : बीडमध्ये दोन महिन्यांच्या नववधूचा जीव; सासरच्या तिघांविरोधात गुन्हा, अटक
योगेश पांडे / वार्ताहर
बीड – पुण्यातील वैष्णवी हगवणे प्रकरणाने राज्य हादरले असतानाच तशीच संतापजनक घटना बीड जिल्ह्यात उघडकीस आली आहे. गेवराई तालुक्यातील राजुरी मळा येथे सासरच्या मंडळींकडून होणाऱ्या छळाला कंटाळून सोनाली बाळू वनवे (वय २२) या नववधूने आत्महत्या केल्याचा धक्कादायक प्रकार घडला. अवघ्या दोन महिन्यांपूर्वी विवाह झालेल्या सोनालीच्या मृत्यूमुळे परिसरात हळहळ व्यक्त होत आहे.
सोनालीचा विवाह दोन महिन्यांपूर्वी जंबुरावस्ती येथील अनिकेत गर्जेशी झाला होता. लग्नानंतर अवघ्या महिनाभरातच पती, सासरे आणि सासू यांनी पाच लाख रुपयांची मागणी सुरू केली. ही रक्कम सोनालीच्या माहेरकडून देण्यात आली. मात्र तरीही छळ थांबला नाही. “मला तू आवडत नाहीस, तुझ्यासोबत राहायचे नाही” असे कारण देत पतीसह सासरचे लोक तिला वारंवार त्रास देत राहिले.
सोनालीने आपली व्यथा आईला व माहेरच्या मंडळींना सांगितली होती. मात्र छळ कमी झाला नाही. अखेर ३१ ऑगस्ट रोजी सोनाली बेपत्ता झाली. शोध घेतला असता तिचा मृतदेह सासरी घराशेजारील विहिरीत आढळला. मृतदेहावर अनेक ठिकाणी जखमा असल्याचे पंचनाम्यात नमूद करण्यात आले आहे.
या प्रकरणी तलवाडा पोलीस ठाण्यात पती अनिकेत गर्जे, सासरे एकनाथ गर्जे व सासू प्रतिभा गर्जे यांच्याविरोधात आत्महत्येस प्रवृत्त केल्याचा गुन्हा दाखल करण्यात आला आहे. पोलिसांनी तिघांना अटक केली असून पुढील तपास सुरू आहे.
या घटनेमुळे परिसरात संतापाचे वातावरण असून कुटुंबीयांनी दोषींवर कठोर कारवाईची मागणी केली आहे. वारंवार घडणाऱ्या हुंडाबळीच्या घटनांमुळे पुन्हा एकदा हुंडाविरोधी कायद्याची कठोर अंमलबजावणी करण्याची मागणी जोर धरू लागली आहे.