“एका वधूचे आठ विवाह, नवव्या पतीच्या शोधात कोट्यवधींची फसवणूक उघड; नागपुरात समिरा फातिमाची अटक”
पोलीस महानगर नेटवर्क
नागपूर : नागपूर शहरातून एक थरकाप उडवणारा गुन्हा उघडकीस आला आहे. समिरा फातिमा या उच्चशिक्षित महिलेने मागील १५ वर्षांत एक-दोन नव्हे, तर तब्बल आठ पुरुषांशी लग्न करून त्यांची फसवणूक केल्याचा आरोप आहे. पोलिसांनी तिला २९ जुलै रोजी नागपुरातील एका चहाच्या टपरीवरून अटक केली असून तिच्या गुन्हेगारी कारवायांचा सखोल तपास सुरू केला आहे.
सोशल मीडियावरून प्रेमाचे जाळे
समिरा फातिमा, जी पूर्वी शाळेत शिक्षिका म्हणून काम करत होती, सोशल मीडियाच्या माध्यमातून विवाहित पुरुषांशी संपर्क साधायची. ती स्वतःला घटस्फोटित असल्याचे भासवून सहानुभूती मिळवायची आणि असे सांगायची की, ‘मी तुमची दुसरी पत्नी म्हणून राहायला तयार आहे, फक्त मला आधार द्या’. या बहाण्याने ती पुरुषांना प्रेमाच्या जाळ्यात अडकवायची, लग्न करायची, आणि काही दिवसांनी सूनबाईपासून ब्लॅकमेलर बनायची.
महिन्याभरात भांडण, मग ब्लॅकमेलिंग
समिरा प्रत्येक नवऱ्याशी लग्नानंतर काही दिवसांमध्येच भांडण घालत असे आणि ब्लॅकमेल करून पैसे उकळायची. पोलिसांच्या माहितीनुसार, एका पीडिताकडून तिने ५० लाख रुपये, तर दुसऱ्याकडून १५ लाख रुपये उकळल्याचे स्पष्ट झाले आहे. ती प्रत्येक लग्नानंतर काही महिने राहून, वेगवेगळ्या कारणांनी पैसे मागत असे, आणि नंतर संपर्क तोडत असे.
पोलिसांचा संशय आहे की समिरा फातिमा मागील १५ वर्षांपासून ही फसवणूक करत होती, आणि ही संपूर्ण कारवाई ती एकटी करत नव्हती. तिच्या पाठीमागे एक संगठित टोळी कार्यरत होती, जी या फसवणुकीचे नियोजन करायची. जेव्हा पोलिस तिच्यापर्यंत पोहोचायचे, तेव्हा ती खोट्या गरोदरपणाचा आरोप करायची आणि पळ काढायची.
नवव्या नवऱ्याच्या शोधात असताना अटक
समिरा सध्या तिच्या नवव्या नवऱ्याच्या शोधात होती, आणि याच दरम्यान पोलिसांनी तिला नागपूरमधून अटक केली. पोलिसांनी तिच्याविरुद्ध फसवणूक, बनावट माहिती, ब्लॅकमेलिंग आणि कट रचणे अशा गंभीर कलमांखाली गुन्हा दाखल केला आहे. तिच्या नेटवर्कमध्ये सहभागी असलेल्या इतर लोकांविरोधातही तपास सुरू आहे.
पोलिसांना विश्वास आहे की, या प्रकरणात अनेक अन्य पीडित पुरुष पुढे येऊ शकतात. समिरा फातिमाच्या जाळ्यात अडकलेल्या पीडितांची संख्या आठपेक्षा अधिक असण्याची शक्यता वर्तवली जात आहे. तिच्या संपर्कातील सहकार्यांना अटक करण्यासाठी पोलिस पथके सक्रिय झाली आहेत.
या घटनेमुळे सोशल मीडियावर व नागपूरमध्ये एकच खळबळ उडाली असून, अशा प्रकारच्या विवाह फसवणुकीपासून सावध राहण्याचे आवाहन पोलिसांकडून करण्यात आले आहे.