पनवेल महापालिकेच्या अतिरिक्त आयुक्त भारत राठोड यांच्यावर बलात्कार व जबरदस्तीने गर्भपात केल्याचा आरोप; तिघांविरोधात गुन्हा दाखल
पोलीस महानगर नेटवर्क
छत्रपती संभाजीनगर – छत्रपती संभाजीनगर शहरातून एक धक्कादायक प्रकरण उघडकीस आले आहे. पनवेल महापालिकेचे अतिरिक्त आयुक्त भारत प्रभाकर राठोड यांच्यासह आणखी दोन जणांविरोधात बलात्कार आणि जबरदस्तीने गर्भपात घडवून आणल्याचा गंभीर आरोप करण्यात आला आहे. या तिघांविरोधात मुकुंदवाडी पोलीस ठाण्यात गुन्हा दाखल करण्यात आला असून शहरात एकच खळबळ उडाली आहे. पीडित महिलेने पोलिसांत दिलेल्या तक्रारीनुसार, भारत राठोड यांनी तिला लग्नाचे आमिष दाखवून वारंवार शारीरिक संबंध ठेवले. यामुळे ती गर्भवती झाली. मात्र, संबंधित आरोपींनी तिच्यावर दबाव टाकून आणि धमकावून तिला तीन वेळा जबरदस्तीने गर्भपात करायला लावला. या गंभीर प्रकारात भारत राठोड यांच्यासह त्यांचे साथीदार विशाल राठोड आणि राहुल या दोघांचा समावेश असल्याचेही तक्रारीत स्पष्ट करण्यात आले आहे.
तक्रारीनुसार, भारत राठोड आणि पीडितेची ओळख काही वर्षांपूर्वी झाली होती. या ओळखीचे रूपांतर जवळीक आणि नात्यात झाल्यानंतर आरोपीने लग्नाचे आश्वासन दिले. मात्र, वेळोवेळी फसवून तिचा विश्वासघात करत शारीरिक शोषण सुरू ठेवले. पीडितेच्या म्हणण्यानुसार, गर्भधारणा झाल्यानंतर आरोपीने तिला मानसिक आणि शारीरिक त्रास देत जबरदस्तीने गर्भपात करवून घेतला.
सध्या पोलिसांनी तिघांविरोधात भारतीय दंड संहितेतील संबंधित कलमांअंतर्गत गुन्हा नोंदवून तपास सुरू केला आहे. पीडितेचा जबाब नोंदवण्यात आला असून आरोपींचा शोध सुरू आहे. या प्रकरणामुळे प्रशासनाच्या वर्तुळात एकच खळबळ उडाली असून वरिष्ठ पोलीस अधिकारी याकडे गांभीर्याने लक्ष देत आहेत. या प्रकरणाच्या सखोल चौकशीची मागणी सध्या सामाजिक संघटनांकडून केली जात आहे. न्याय मिळावा यासाठी पीडितेने मुख्यमंत्री आणि महिला आयोगाकडेही दाद मागण्याची तयारी दाखवली आहे.
ही घटना प्रशासनातील जबाबदार पदावरील व्यक्तींविरोधात गंभीर आरोप करत असल्याने संपूर्ण राज्याचे लक्ष या प्रकरणाकडे लागले आहे. तपास पूर्ण होईपर्यंत भारत राठोड यांना तात्पुरत्या स्वरूपात पदावरून बाजूला करण्याची मागणी सुद्धा जोर धरत आहे.